Двајца турски војници се убиени во заседа поставена од припадниците на забранетата Работничка партија на Курдистан (PKK) во југоисточната покраина Ширнак, а уште еден е убиен во одделен напад во истата покраина, пренесуваат турските медиуми во вторникот.

Борците на PKK нападнале патрола на турските безбедносни сили утрото во вторникот, при што покрај двајцата загинати војници ранет е и припадник на селската милиција составена од локално население, откако на локалниот пат била детонирана експлозивна направа, се наведува во армиското соопштение.

Со додава и дека веднаш по инцидентот полетал авион до воената база Малатја кој извршил бомбардирање во планинската област Даглача во југоисточна покраина.

Попладнето, пак, уште еден турски војник е убиен а друг ранет во одделен инцидент кој ѝ се припишува на PKK, кога со ракетен фрлач била гаѓана командна позиција на 172-та тенковска бригада на турската армија стационирана крај градот Силопи, исто така, во покраината Ширнак.

Претходно ноќта кон вторникот уште еден припадник на жандармеријата бил ранет кога неговото оклопно возило наишло на далечински активирана експлозивна направа поставена крај пат во округот Нусајбин на југоисточната покраина Мардин.

Турција по нападот од 20-ти јули во пограничниот град Суруч во кој беа убиени 32 курдски активисти во самоубиствен бомбашки напад што го изведе млад турски џихадист припадник на Исламската држава убиството на двајца полицајци во југоисточните покраини за што одговорноста ја презема PKK, презема антитерористичка операција. Во воздушните удари, декларирано цел на турската авијација се позициите на Исламската држава во Сирија за што инаку многу малку информации, и врз PKK во северната ирачка автономна покраина Курдистан, каде што тврди дека елиминирала најмалку 300 нејзини борци.

Според медиумите, во терористичките напади на турска територија изминатава седмица загинале 50 луѓе, откако курдската организација на своите интернет страници објави дека примирјето со Анкара и мировните преговори започнати во 2013 година по повеќе од три децении и 40.000 жртви, „го загубило значењето“./крај/мф/сн

Извор: Макфакс