Домашен
Карпош Соколи: Во БИБЛ не се почитуваат основните стандарди
БИБЛ лигата ја определи казната за Карпош Соколи, откако актуелниот освојувач на Купот на Македонија, во средата, замина од паркетот во 27. минута и не го заврши натпреварот со Теодо.
Карпош Соколи вкупно на сметка на БИБЛ ќе треба да плати 10.000 евра, односно казната за напуштањето на теренот за мечот со Теодо е 5.000 евра, а истата сума скопскиот тим треба да ја плати бидејќи на мечот со Куманово не ги почитувал пропозициите, односно на теренот немало домашен играч.
БИБЛ му наложи на Карпош Соколи најдоцна до петок да уплати 6.000 евра доколку тимот сака да продолжи да се натпреварува во Балканската лига.
Од друга страна, Карпош Соколи низ соопштение апелира до Македонската кошаркарска федерација (МКФ) и до другите национални федерации да покренат иницијатива со која ќе биде ставен ред во БИБЛ лигата, односно да се добие „натпреварување признаено од ФИБА, кое реално ќе придонесе за развој на кошарката во регионот“.
„Соколите“ велат дека неофицијално сите клубови го делат нивниот став, но се дел од лигата бидејќи сакаат да играат меѓународни натпревари.
„Во отсуство на иницијатива на националните федерации, злоупотребена е можноста за организација на вакво натпреварување, од страна на физички лица, кои водат катастрофални политики, непочитувајќи какви и да се стандарди во организацијата, своеволно водејќи го натпреварувањето, кое има само негативни импликации врз кошаркарскиот спорт“, се вели во дел од соопштението.
Исто така, од клубот велат дека од почетокот на сезоната имаат лош третман и катастрофално судење, а дека сето тоа кулминирало на натпреварот со Теодо.
„Нашиот клуб во континуитет има катастрофален третман од раководството на Лигата и во континуитет има катастрофално судење, најгрубо прекршувајќи ги елементарните правила на кошаркарската игра, кое кулминираше на натпреварот со КК Теодо од нашата збратимена општина Тиват“, додаваат.
Карпош Соколи, исто така, посочуваат дека на мечот со Теодо бил делегиран судија кој воопшто го немал положено лагер тестот на ФИБА.
„За судиите можеби и можеме да најдеме оправдување, бидејќи имаме информации дека долгот на БИБЛ кон судиите за такси и патни трошоци е близу 100.000 евра (само кон нашите судии и делегати околу 20.000 евра), а газдата на лигата постојно им се заканува да ги слушаат неговите инструкции, повикувајќи се на блиски релации со раководни лица на ФИБА, преку кои ќе им ја уништел кариерата!?
Големиот број на казни, кои неоправдано ни ги изрекува раководството на Лигата, имаат само еден мотив – финансиски, со цел што е можно повеќе да се компензира гарантниот повратен депозит, кој клубот го депонираше како гаранција за учество и плаќање на евентуалните казни, а БИБЛ треба да му го врати по завршување на сезоната.
До овој момент БИБЛ лига не вратиле ниту еден “повратен” депозит, барем не на клуб кој е член на МКФ, а претходно партиципирал во ова натпреварување, а долговите кон нашите судии од коло во коло се зголемуваат.
Поради ова, се повеќе квалитетни судии ги откажуваат делегирањата, па во таков случај, на вчерашниот натпревар, ни беше делегиран судија кој воопшто и несмее да биде делегиран, бидејќи не го положил легер тестот за судии за оваа натпреварувачка сезона, и неможе да го носи знакот на ФИБА“, се наведува меѓудругото во соопштението од КК Карпош Соколи./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.