Македонија
Четириесет жртви на семејно насилство побарале бесплатен правна помош преку проектот Пристап до правда

Во изминатите дванаесет месеци, откако проектот Пристап до правда во Македонија започна да се имплементира, повеќе од илјада граѓани се обратиле кај овластените здруженија и побарале бесплатно правно советување.
Меѓу барателите на оваа бесплатна правна помош се и жртвите на семејно насилство. Вкупно четириесет жртви на семејно насилство побарале бесплатен совет и информација кај овластените здруженија, а на дел од нив им било потребно судско застапување со цел заштита на нивните права.
Жртвите на семејно насилство најчесто се обраќаат до овластените здруженија, каде правниците ги советуваат и им помагаат при пополнување на барањето за бесплатен адвокат. Ваквото барање се доставува на одобрување до Министерството за правда. Таков е и случајот со една од барателите – самохран родител кој ги користи услугите на овластените здруженија за бесплатен правен совет или информација.
Барателката со помош на овластеното здружение добила бесплатен адвокат за утврдување на правото на издршка на малолетно дете во март 2015 година. Благодарение на бесплатниот адвокат нејзиното дете сега добива издршка од својот татко. Понатаму, во текот на 2016 година барателката редовно го посетувала овластеното здружение за да добие совет или информација, па така во три наврати и бил даден совет за: правото и постапката за поднесување на кривична пријава и водење на кривична постапка за неплаќање на издршка за малолетното дете; водење на постапка за уредување на начинот и динамиката на одржување на лични контакти и средби, како и можноста за користење на правни лекови против решение од Министерство за труд и социјална политика од страна на нејзиниот поранешен вонбрачен партнер чие барање било одбиено, но и за правото на разгледување на списи, кое го вклучува и правото на препис – копии на две решенија.
Ова се само неколку евидентирани случаи кога барателката побарала помош од овластеното здружение, но таа редовно ја посетува канцеларијата за различни правни прашања со кои се соочува во своето секојдневие.
Проектот Пристап до правда во Македонија останува посветен на овозможување на пристап до правда за сите граѓани и покрај утврдените слабости на постоечкиот систем на бесплатна правна помош и предизвиците со кои се соочуваат овластените здруженија.
Проектот Пристап до правда во Македонија е финансиран од страна на Европската Унија преку инструментот за демократија и човекови права (EIDHR). Проектот се спроведува од страна на Фондацијата Отворено општество – Македонија заедно со партнерите Национален ромски центар од Куманово, ЕХО Едукативно – хуманитарна организација од Штип, Младински културен центар Битола, Избор од Струмица и Хелсиншки комитет за човекови права на Република Македонија, овластени здруженија за давање бесплатна правна помош согласно Законот за бесплатна правна помош./крај/мф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.
Скопје
Арсовска: Претседателката на „Комунална“ е осудена за убиство и 3 години саботира нова опрема

Градоначалничката на Скопје, Данела Арсовска, денеска остро ја обвини Јулијана Спировска, претседателка на Управниот одбор на ЈП „Комунална хигиена“, дека ја саботира работата на претпријатието и со години опструира одлуки од витално значење за функционирањето на службите за одржување на јавната чистота.
Во своја објава на Фејсбук, Арсовска посочи дека Спировска е осудено лице за кривично дело убиство и дека, како што тврди, три години не поддржала ниту една инвестиција за нова механизација, ниту решенија за вработување на работниците кои со години работат на терен.
„Јулијана е осуден криминалец со казна затвор за убиство. Таа три години не гласа за нови камиони, за инвестициска програма, за вработените кои пет години ги чистат улиците да можат да земат решение“, напиша Арсовска.
Според неа, Спировска делува под директива на политичките партии ВМРО-ДПМНЕ и Вреди, чиј што кадар е поставен во Управниот одбор преку Советот на Градот. Арсовска директно ги обвинува овие партии дека преку Спировска ја саботираат работата на претпријатието и придонесуваат за влошување на состојбата со отпадот во Скопје.
„Јулијана по наредба на ВМРО континуирано прави опструкции додека градот не се удави во смет. Не биди ѓубре, не биди криминалец, не биди Јулијана“, додаде Арсовска.
Таа истакна дека вработените во „Комунална хигиена“ се едни од највредните работници во градот и дека заслужуваат институционална поддршка, а не, како што вели, саботажа од партиски кадри.
Македонија
Левица: Владата троши 450.000 евра за луксуз, додека гласа против минимална плата од 500 евра

Додека граѓаните се соочуваат со секојдневни ценовни шокови, Владата предводена од ДПМНЕ троши стотици илјади евра за морски плодови и хотелско сместување, обвини денеска политичката партија Левица. Од партијата велат дека ова се случува паралелно со одбивањето на нивниот предлог за зголемување на минималната плата на 500 евра.
„Очигледно, за расипничката власт на ДПМНЕ има пари само за нивните луксузни апетити, но не и за работниците кои едвај врзуваат крај со крај“, соопштува Левица.
Според податоците кои ги објавија од партијата, владината Служба за општи и заеднички работи во мај склучила два тендери со вкупна вредност од 450.000 евра. Првиот договор, вреден 11,8 милиони денари, се однесува на набавка на риба, месо и сувомеснати производи, додека вториот – во износ од 16,5 милиони денари – се однесува на хотелско сместување за владините функционери.
„Се работи за јасен пример на лицемерие и двојни стандарди. Власта гласаше против предлогот за минимална плата, кој го поднесовме по барање на синдикатите, а во исто време склучува договори за луксузни вечери и хотели“, изјавуваат од Левица.
Од партијата додаваат дека власта не служи на граѓаните, туку на „крупниот капитал и блиски бизнис-центри“, додека реалната економска состојба е далеку од она што, според нив, „скапата ПР-машина“ на Владата се обидува да го прикаже.
„Македонија не е економска сила, туку земја во која работниците гладуваат, младите се иселуваат, а функционерите се гоштеваат со морски плодови за сметка на народот“, порачуваат од Левица.