Европа
Сведоштва за случувањата во Батаклан, преживеаните трчале преку мртвите тела за да се спасат
Црн „фолскваген поло“ автомобил бил паркиран пред концертната сала „Batcaclan“ во Париз, а од него околу 21.40 часот излегле три вооружени напаѓачи, кои за половина час биле мртви, но претходно успеале да убијат 89 лица и да ранат уште 99, пишуваат светски медиуми.
„Изгледаше како кланица. Јас преминував преку телата на жртвите за да избегам надвор“, рекол 30-годишниот Британец Мајкл Конор, еден од преживеаните од петочниот напад кој се случи во петокот во Париз.
Парискиот јавен обвинител соопштил дека сега започнала реконструкција на настаните за да може да се поврзат сите докази. Меѓутоа, слика на случувањата може да се добие и од оние кои успеале да побегнат, пишува BBC.
Неколку преживеани за весникот Liberation опишале како изгледала заложничката криза во Батаклан. Напаѓачите влегле на главниот влез во 21.40 часот, а концертот на рок групата Eagles of Death Metal започнал 30-45 минути претходно.
Терористите веднаш почнале да пукаат на насобраната публика, а тројца од преживеаните навеле дека први на мета биле оние кои стоеле на шанкот.
„Прво помислив дека тоа е дел од програмата, но потоа се завртев и видов луѓе кои веќе беа погодени од куршуми“, рекол еден од очевидците. Според некои информации, еден од напаѓачите се качил на балканот, од каде продолжил со пукањето. Член на обезбедувањето се обидел дел од публиката да спроведе од излезот кој се наоѓа на левата страна од скалите, рекол уште еден очевидец.
Многу од нив успеале да излезат, а некои пак биле тешко ранети. Новинарката на Europe 1, Џулиен Пирс навела дека била скриена под скалите околу десетина минути, додека траел нападот. Околу 50 лица биле пронајдени близу кровот од зградата каде што се сокриле и го чекале завршувањето на полициската акција.
„Едно момче беше повредено и викаше. Се обидовме да го убедиме да не мрда бидејќи секојпат кога некој ќе се мрднеше имаше уште пукање“, изјавила Тереза Седе, една од преживеаните. Како што навела таа, после „цела вечност“, пристигнала и полицијата.
„Можев да го видам влезот во салата позади нас. Видов отворена врата. Не знаев што следи, потоа видов батериска лампа и сфатив дека тоа е полицијата. Беа со штитови и ни покажуваа да останеме мирни. Сето оружје го насочија кон балканот каде што беа терористите. Тогаш повторно слушнавме пукање, не знаевме дали тоа беше од полицијата или пак од оние кои отидоа на балконот“, рекол Конор.
Како што соопштил францускиот јавен обвинител, полицијата на балканот застрелала еден од терористите, а неговиот појас со експлозив експлодирал. Другите двајца напаѓачи веднаш потоа се разнеле.
„На крајот полицијата ни рече да мафнеме за да знаат дека сме живи. Тоа беше големо олеснување“, додал Конор.
Во тој момент заложничката криза била завршена, но маратонот на спасувањето на оние кои биле повредени само што започнал, пишува BBC./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Украинците објавија снимка: Го уништивме рускиот систем Бук, не можеа да го изгаснат пожарот
Украинските сили за специјални операции тврдат дека го уништиле лансерот на рускиот противвоздушен ракетен систем Бук на линијата на фронтот во регионот Суми.
Според извештаите, операторите во украинската единица забележале руски противвоздушен ракетен систем Бук-М1 додека изведувале борбени операции на фронтот.
Операторите потоа користеле нападни беспилотни летала за да ја нападнат целта. Русите неуспешно се обиделе да го изгаснат пожарот и да ја спасат својата опрема, тврдат Украинците. Тие споделија и видео на кое се гледа експлозијата и последователниот пожар.
Украинците наведуваат дека лансерот со шест проектили бил уништен со прецизен удар. Инаку, Украинците во вторникот пријавија и уништување на два Бука на истиот дел од бојното поле.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.