Daily news
Излезе од печат првиот македонски готвач за бебиња и деца – „Бебе Готвач“
Мајките и сите останати што се грижат за бебињата и малите деца во земјава, за првпат добиваат автентичен печатен водич во исхраната на своите најмили. Првиот македонски готвач за бебиња и деца – „Бебе Готвач“ е на 280 страници и содржи 350 рецепти за бебиња и деца, почнувајќи од 6 -месечна возраст, па нагоре.
Освен рецепти за подготовка на храна, книгата изобилува и со многу автентични фотографии од оброци кои се приготвувани непосредно пред фотографирањето. Рецептите се поделени по месеци, а пред секој месец има соодветна статија за тоа како се развива бебето и што да се очекува во тој месец, како и соодветни табели со информации за тоа кои намирници се препорачуваат да се воведат во исхраната.
„Патот на оваа книга ни малку не беше едноставен и лесен, но знаејќи дека има многу родители, особено мајки како нас, кои наеднаш се соочуваат со милион обврски околу новиот член во семејството, знаевме дека крајниот резултат ќе вреди.
Како две мајки чија цел беше да си го олесниме секојдневието го создадовме Бебе Готвач за нас како и за сите оние кои сакаат да ги хранат своите деца здраво и да учат заедно со нас новини кога станува збор за бебешката исхрана. Овој готвач е за оние кои сакаат да готват домашни, здрави оброци за себе и за своите деца и да ја откријат убавината и мирисот на свежо подготвена храна кои ќе создаваат спомени со топлина и љубов“, велат авторките на „Бебе Готвач“, Ирина Наков и Елена Петковска, на неговата прва јавна промоција.
За составување на рецептите консултирани се стручни лица, а користени се и информации од голем број брошури за правилна исхрана на бебиња, интернационални готвачи, како и искуства од мајки. Она што е најважно е што рецептите се во согласност со препораките од „Прирачникот за правилна исхрана на доенчиња и мали деца“, издаден од Институтот за Јавно Здравје на Република Македонија, како и препораката на експертите дека дохраната кај бебињата треба да започне по шестиот месец од раѓањето.
Книгата е во продажба од денеска (4-ти мај 2017), во книжарниците на издавачкиот центар „ТРИ“, Клуб Матица, Тримакс и продажната мрежа на продавниците за здрава храна БИО-култ.
Пред издавањето на книгата – говач за бебиња и деца, беше лансирана и софтверска апликација „Бебе Готвач“ која веќе е одлично прифатена од голем број корисници. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.