Daily news
(ВИДЕО) За пратениците на ВМРО-ДПМНЕ ребалансот не е реформски, СДСМ со поддршка на кратењата
Пратениците на ВМРО-ДПМНЕ сметаат дека ребалансот на буџетот не е реформски, односно нема развојна компонента. Пратеничката Лилјана Кузмановска и претседателка на Комисијата за буџет и финансирање рече дека сите ставки што ги предвидела претходната влада, а се однесувале на поддршка на развојни проекти, биле скратени и биле додадени ставки со кои се субвенционираат проекти што не носат приходи.
„Сите проекти што значеа развој ги скративте. Без законско решение ќе зголемувате минимална плата, без образложение по кои критериуми, кои компании ќе ги добијат субвенциите. Нема ништо објаснето, а зборувате за транспарентност. Ќе има нови вработувања и зголемување на платите. За привремени вработувања се предвидени 325 илјади евра. Какво е оваа сеење магла? Од друга страна, градежништвото стагнира, има пад за 6,3 %, а знаеме дека тоа носи најголемо раздвижување“, рече Кузмановска.
Министерот Тевдовски рече дека пад во градежништвото бил забележан уште на почетокот на годината и дека новата Влада ќе бара начини за негово раздвижување. Тој додаде дека, сепак, во ребалансот, акцентот е ставен на поддршка на домашните компании, а за поддршката на странските инвеститори, рече дека ќе следи по пост-бенефициска анализа која ја подготвувало Министерството.
„Постои поддршка и за странските инвеститори, ги има тие ставки во буџетот. Ние сакаме тие да се чувствуваат безбедени и да дадат една позитивна слика за климата во државата. Сепак, ние, како што најавивме, ќе направиме анализа што ќе покаже какви се бенефитите од овие инвестиции и во која форма е потребна субвенција“, рече Тевдовски.
Пратеникот на СДСМ, Јован Митревски, на распрвата по ребалансот рече дека кратењата биле неопходни за да може да се реализираат реформските проекти што ги ветила Владата.
„Буџетот е нереално проектиран и ние кога бевме во опозиција укажувавме на тоа. Ова беше најгломазен и најнеостварлив буџет досега. Затоа сега со ребалансот се прави корекција на оние непродуктивни трошења, а средствата се пренасочуваат за проектите како што се минимална плата, поддршка за мали и средни претпријатија и вработување на младите, за помош на стечајаците, за социјалата“, рече Митревски.
За дискусија, осносно реплика се јави пратеникот Крсто Мукоски од ВМРО- ДПМНЕ кој реагираше на кратењата за изградба на автопатите, тврдејќи дека со ова власта ги сече клучните проекти кои носат бенефиции за граѓаните. Тој забележа и на субвенционирањето на МРТВ и рече дека никаде во Европа нема целосно финансирање на јавниот сервис.
Како и досега и на Комисијата за финансирање и буџет, пратениците од мнозинството ја напуштија салата на говорот на Мукоски. По ова седницата беше прекината со едночасовна пауза.
Инаку, денеска почна општата распрва по ребалансот, по што ќе следи разгледување на поднесените 840 амандмани. Од нив 706 поднела ВМРО-ДПМНЕ, додека останатите 134 амандмани се од партии од албанскиот политички блок.
Габриела Д. Мишевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.