Регион
ЕУ финансиски ќе му помогне на западен Балкан во борбата против исламската радикализација
Европската унија (ЕУ) со финансиска помош од 10 милиони евра ќе им помогне на земјите од западен Балкан во борбата против исламската радикализација и приливот на терористите, пишува српската агенција Бета.
Предлогот од страна на Европската комисија (ЕК) доаѓа во рамките на засилената борба против тероризмот на тлото на Европа, а особено било укажана и потребата од итно активирање на планот за соработка меѓу ЕУ и државите од западен Балкан во спречувањето на шверцот на огненото оружје кое во големи количини од регионот се шверцува во Унијата.
Новите мерки на ЕУ ќе вклучуваат и подобрување на досега недоволната разузнавачка соработка и размена на информации помеѓу самите членки на ЕУ, нешто што би се одвивало „во најстрога доверливост“ преку полициската агенција на ЕУ, Европол, во рамките на Европскиот антитерористички центар.
Членките на ЕУ и Комисијата истовремено, како што укажала и портпаролката на Комисијата, Маја Коцијанчич, „го осудиле страшниот и злосторнички напад“ на исламските терористи врз полициската станица во Зворник и потенцирале дека „тоа е напад на институциите на БиХ кои делуваат за да ги заштитат и обезбедат интересите на народот на БиХ“.
Високиот функционер на ЕК задолжен за борбата против тероризмот, Жил де Керков неодамна во расправа за безбедноста при Европскиот парламент ставил до знаење дека ќе се следи делувањето на исламските терористи во Босна.
На прашањето дали новите мерки за соработката со западен Балкан во сузбивањето на тероризмот значи дека се гледа и опасност од широко поврзување на исламските терористи во регионот или преку регионот, што македонскиот претседател Ѓорге Иванов своевремено го нарече „закана од создавање на балкански калифат“, европските дипломатски извори одговориле дека „такви сознанија не постојат“, пишува Бета.
Меѓутоа тие потенцирале дека скривалишта и јатаци на исламските терористи, вклучувајќи ги Ал-Каеда и „калифатот“ на Исламска држава, постојат во делови од западен Балкан, особено во Босна, Албанија, Косово, па и во Македонија, бидејќи од таму во редовите на Исламска држава во Сирија и Ирак се регрутирани повеќе од стотина екстремисти.
Европските дипломати изјавила дека за ова сведочи и фактот што бугарските власти неодамна на бугарска територија уапсиле исламски екстремисти кои патувале од Ирак и Сирија во оваа земја.
Во документот на ЕК, односно Европската програма за безбедност 2015-2020 исто така се подвлекува дека „шверцувањето на оружја прераснало во голема опасност, бидејќи голема количина на огнено оружје се шверцуваат од ЕУ во соседните земји, каде постојат големи залихи на воено наоружување“.
Во тој документ исто така се наведува дека „неодамнешниот оперативен акциски план со државите на западен Балкан мора целосно да се спроведе, и доколку се покаже како делотворен, мора да се примени на другите соседи, особено на Блискиот исток и на северот на Африка“.
Европските претставници укажале на пораката од страна на ЕК дека „неодамнешните терористички напади на вредностите на Европа се насочени и преку границите“.
„Тоа покажува дека мораме заедно да се бориме за да ја победиме таа закана, а прекуграничните предизвици ја доведуваат до прашање способноста на одредени земји да се борат со тоа, така што тоа бара поддршка од ЕУ во градењето на доверба за соработка, размена на информации и заедничко делување“, навеле тие.
Европските претставници потенцирале дека оваа состојба во ЕУ станала доста чувствително политичко прашање и поради тоа што, како што покажуваат последните истражувања на Евробарометар, скоро половина од граѓаните на ЕУ сметаат дека тероризмот е главната неволја со која се соочуваат./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Поставен рекорд во центарот на Белград: 1.000 гитаристи свиреа истовремено
Концертот на „Guitar Art“ денеска собра 1.000 гитаристи на плоштад во Белград, кои поставија национален рекорд во присуство на инструменталисти кои свират на гитара и слични инструменти, пренесе српска „Политика“.
Концертот „1.000 гитари“ ги привлече пред се во центарот на Белград најмладите гитаристи и нивните учители, но заедно свиреа цели семејства, составени од три генерации: дедо, татко и син…
Имаше мајки и ќерки кои „замавнаа“ со белградскиот блуз квартет и специјалните гости на концертот, меѓу кои Дејан Цукиќ, Ју групата, Кики Лесендриќ и Пилотите, Срѓан Гојковиќ Гиле, Бојана Стаменов, Никола Чутурило – Чутура. „Ова е конечно моментот кога барем на еден час ги заменуваме силиконите за витамини на ’Трг Републике’. Ова е сеќавање на мојата младост и почетоци во рокенролот. Среќен сум“, изјави Никола Чутурило Чутура за Танјуг.
За неколку минути неколку илјади љубопитни луѓе се собраа на плоштадот да уживаат во првокласен музички настан.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.