Daily news
(ВИДЕОИНТЕРВЈУ) Бени Шаќири: Треба да си доволно луд да опстанеш овде како музичар
„Немој да се курчиш“ е новата песна на Бени „Нон стоп“. Видеото што вчера го промовира на каналот „Јутјуб“ е снимано во една работилница за заварување кај чичко Кадри во Ресен. Спотот го режира Чедо Поповски.
Насловот на песната, а и самата нејзина поента, е со посебна приказна.
„Со оглед на ситуацијата во која живееме мораше да излезе оваа песна. Знаеш, сите нешто се замислуваат, а гладни и боси се до бога. Ете затоа и морав да ја направам оваа песна зашто сите на крајот нѐ чека по два кубика земја“, вели Бени Шаќири. Тој во разговорот ни откри дека отсекогаш застапувал теза дека никој не е вечен. Вели дека се надева оти сето тоа успеал да преточи во песна. „Дали успеав или не, ќе покаже времето. Кај нас владее една манија дека сѐ што ќе излезе мора да е хит. Е, па, не мора да е така“, искрен е Бени.
Тој е 17 години на музичката сцена. Вели дека треба да си доволно луд да опстанеш овде како музичар, но сепак на крајот од денот вели дека верува во она што го работи.
Сѐ погласен беше на улиците со „Нема правда, нема мир“. Дел од шарената револуција, каде што гласно го искажуваше своето незадоволство од претходната власт. Во еден свој статус на социјалните мрежи во пресрет на Суперкупот вели: Овие што утре ќе играат заедно немаат толку заработено колку што нашиве искрадоа“.
„Додека го следев фудбалот, некаде слушнав дека во моментот 6 милијарди евра се на теренот. Си велам, ова е гола вода во споредба со тоа колку пари се украдени. И ова може на прва звучи смешно, но навистина е многу тажно“, вели Бени. И додава, замисли да не беа украдени тие пари и да останеа тука, ќе бевме пристојно европско општество“. Таткото на двете деца, Мик и Бен, вели дека сѐ што прави, прави за нив. Дека никогаш нема да ги тера да го работат она што не го сакаат и дека тие се центарот не неговиот свет. За октомври најавува нова песна, а вели дека во план е и цеде на кое ќе бидат сите негови теми.
Александра Георгиев
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.