Регион
Унгарија не дозволи влез на возови со мигранти од Србија

Унгарија во неделата не дозволи на нејзината територија да влезат два меѓународни воза од Србија, бидејќи во нив имало мигранти, соопштија Железници на Србија.
Прво во Суботица е запрен меѓународниот патнички воз кој од Белград кон Будимпешта тргнал во саботата навечер, будејќи Унгарски железници (MAV) не сакале да го примат поради големиот број мигранти и бегалци кои во возот се качиле во Белград.
Според белградските медиуми, овој воз до неделата претпладнето во Суботица чекал дозвола да ја мине границата, но дефинитивно било откажано продолжувањето на патувањето, а сите мигранти останале во Суботица.
Проблем имале и патниците во меѓународниот воз „Авала“, кој од Белград тргнал во неделата претпладнето кон Виена преку Будимпешта, бидејќи MAV не дозволиле влез на територијата на Унгарија. Возот стоел сé додека не биле исклучени вагоните во кои се наоѓале мигрантите, се истакнува во соопштението до медиумите од Железници на Србија.
Мигрантите не сакале да излезат од возот, бидејќи купиле билети до Будимпешта, иако немале неопходни документи за влез во земјата. А тој проблем во неделата отвори широка дебата на социјалните мрежи за тоа „кој воопшто во Белград можел да им продаде билети на мигрантите“, ако се знаеле каква политика кон нив води Унгарија.
„Бегалците останаа во Суботица, а за другите патници беше организиран натамошен транспорт“, јави во неделата вечерта Радио-телевизија на Србија (РТС) од Суботица, од каде возот го продолжил патувањето со задоцнување од речиси два часа.
Преку границата меѓу Србија и Македонија кај Прешево и Миратовац во неделата минале уште неколку стотици мигранти и бегалци, а според последните податоци само во центарот за прифаќање во Прешево од почетокот на мигрантската криза се регистрирани повеќе од 70.000 луѓе.
Според податоците коишто ги објави српскиот министер за надворешни работи Ивица Дачиќ, од почетокот на 2015 година до крајот на август „државата граница на Србија ја минале над 120.000 луѓе, од кои намера да побараат азил во Србија искажале помалку од 108.000, но само 500 лица навистина тоа и го сториле“, определувајќи се да живеат во Србија./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Девојки скокнале од воз во движење бидејќи ја пропуштиле својата станица, едната е во критична состојба: хорор во Бугарија

Две девојки, на возраст од 20 и 21 година, биле итно префрлени во болница во Пловдив откако скокнале од патнички воз на линијата Софија-Бургас во близина на железничката станица „Клисура“, потврди вчера прес-центарот на Одделот за внатрешни работи во Пловдив. 20-годишната девојка се здобила со тешки повреди и е во критична состојба, објавува порталот 24chasa.bg.
Инцидентот бил пријавен во службите за итни случаи во вторник околу 13:30 часот. Според првичните информации, девојките скокнале од прозорецот додека возот се движел, објавува БНТ.
Се наведува дека тие скокнале од возот во движење бидејќи ја пропуштиле станицата од каде што требало да слезат.
Наводно, не успеале да ја отворат вратата од вагонот на време. Кога конечно успеале да го сторат тоа, решиле да скокнат, но возот веќе добивал брзина.
Покрената е прелиминарна истрага и е известено Окружното обвинителство.
Поради инцидентот, сообраќајот помеѓу станиците „Клисура“ и „Стрјама“ е привремено прекинат.
Според Антонија Иванова од прес-центарот на Универзитетската болница за активен третман „Свети Георги“ во Пловдив, состојбата на 20-годишното девојче е исклучително лоша, објавува 24chasa.bg.
„Во моментов не можам да дадам никакви дополнителни информации. Другото девојче, кое има 21 година, е хоспитализирано во клиника во здравствена установа во стабилна состојба“, рече таа.
фото: принтскрин
Регион
Дете остана без рака при експлозија на плажа кај Будва

Страшна несреќа се случи на плажа во близина на Будва, каде што вчера експлодираше боца за нуркање. Во таа прилика, едно дете беше тешко повредено.
Црногорската полиција го уапси М. Б. (45), граѓанин на Белград, кој е обвинет за предизвикување јавна опасност и нелегални активности. Според официјалните информации, осомничениот управувал со опрема за нуркање без потребната регистрација или одобрение, што, како што е наведено, ги загрозило животите на присутните.
Детонацијата се случила во непосредна близина на плажата, кога експлодирала боцата за нуркање. Делови од неа одлетале на поголемо растојание и го погодиле детето, странски државјанин, во раката, што довело до ампутирање на неговата рака. Повреденото дете веднаш било пренесено во болница.
До него, уште две лица се здобиле со полесни повреди од експлозијата и побарале медицинска помош.
На местото на настанот дошол обвинителот на Основното државно обвинителство во Котор, заедно со експерти од машинската струка, каде што била спроведена истрагата. По спроведените мерки и дејствија, М.Б. бил уапсен и приведен од надлежните органи.
Несреќата предизвика голема вознемиреност кај туристите и локалните жители, додека истрагата треба да ги утврди сите околности и одговорноста на осомничениот, пренесуваат медиумите во соседството.
Фото: принтскрин
Регион
(Видео) Вучиќ рече „ќе ги намалиме потрошувачките кредити“, а потоа замолче и ја смени темата

Српскиот претседател Александар Вучиќ вчера од Палатата на Србија презентираше нов пакет економски мерки за подобрување на животниот стандард на граѓаните. Мерките, кои тој ги нарече „чудесни“, вклучуваат ограничување на маржите на најголемите малопродажни синџири за 3.000 производи и намалување на каматните стапки на готовинските и потрошувачките кредити.
„Дали знаете што се потрошувачки кредити? Кога ви треба кредит за огревно дрво, за зима итн. Малкумина користат потрошувачки кредити. Но, ние ќе ги намалиме потрошувачките кредити…“, рече Вучиќ, по што замолчи седум секунди.
„Прво ќе зборувам за готовинските кредити бидејќи се подобри и поважни“, рече тој потоа, прекинувајќи ја тишината и менувајќи ја темата.
Ovo ko kad je Lune Šćekić polagao poslednji ispit🤡 pic.twitter.com/mueYmtkNJu
— Суки (@doktorzakrave) August 24, 2025
Вучиќ двапати ги опомена новинарите кои се смееја за време на конференцијата.
„Немам ништо против вас од медиумите ако најдете нешто смешно, но ве молам да покажете основно почитување кон местото каде што се наоѓате“, рече тој.
Дополнително, тој им покажа на камерите корпи со разни производи чии цени треба да бидат пониски. „Ова се силни и значајни мерки што ќе ја зголемат вкупната потрошувачка и ќе им користат на обичните, посиромашни луѓе“, нагласи тој.
фото: принтскрин