Daily news
ВМРО-ДПМНЕ: СДС крати на пензионерите, а троши на луксузирање
„Дојде први септември, а пензионерите не го добија ветеното и најавено покачување од 5 % проценти на пензиите. Преку 300. 000 пензионери останаа излажани и изманипулирани од СДС. ВМРО предупреди дека Заев лаже и дека кога пензионерите ќе ги подигнат своите пензии нема да ги добијат 5-те проценти што им следуваат. Нема да ги добијат ниту 650 денари кои им ги даваше ВМРО, а уште помалку 2.100 денари колку што ги лажеа Заев и Царовска дека ќе им дадат како покачување“, изјави денеска Орце Ѓеорѓиевски.
Според него, тоа е вистинскиот лик на Заев и СДС. Лаги, манипулации, неизвесност и неспособност да се реализира ништо. „Ова не е прв пат пензионери да бидат изманипулирани од страна на СДС. Пензионерите добро паметат дека токму во времето на владеењето на СДС пензиите, наместо да растат им беа намалени за 8%. Во 2006 година просечната пензија изнесуваше 7864 денари, додека во 2016 година 13754 денари, што претставува зголемување за 79%. Пари за пензионерите нема, но пари за расфрлање и луксузирање на функционерите на СДС се наоѓаат. За само 25 дена по распишување на локалните избори, владата предводена од СДС потрошила неверојатни 32 600 000 евра на стоки и услуги и незаконски вработувања на партиски послушници и таканаречени шарени револуционери“, додава Ѓеорѓиевски.
Тој додаде дека СДС крати од пензионерите и го укина покачувањето пензиите од 5%, но затоа потроши преку 30 милиони евра на луксузи, патувања, дневници, опремување на кабинети и за вдомување на партиски војници.
„Расипничката влада на СДС, поради катастрофалните економски политики кои ги води во изминатиот период, успеа да ја повлече економијата во надолна линија. Откако е СДС на власт за прв пат после долго време имаме пад на индустриското производство за 2,2%, за прв пат имама пад на просечната плата за 0.7%. Имаме 100 милиони евра помалку странски директни инвестиции во јули 2017, за разлика од јули минатата година. Граѓаните ваквата недомаќинска и неодговорна политика на СДС ја препознават. Ваквото безобразно и непрофесионално владеење ќе заврши многу брзо. На предстојните локални избори граѓаните ќе им соопштат што мислат за расипничката политика и СДС ќе биде поразен на изборите“, изјави Орце Ѓеорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.