Daily news
Министерот Спасовски на меѓународна научна конференција во Охрид
Во изминатите две децении земјите од Балканот, тргнувајќи по патот на евро-атлантските интеграции како примарен национален интерес, веќе ја одредија својата позиција, но и позицијата на регионот. Тоа, заедно со регионалните специфики и историска-политичката заднина, истовремено ги детерминира и предизвиците пред кои се исправени земјите од регионот“, рече министерот за внатрешни работи, Оливер Спасовски, во своето обраќање на отворањето на меѓународната научна конференција „Балканот помеѓу Западот и Истокот: стари и/или нови безбедносни предизвици“, што од денеска до четврток се одржува во Охрид во организација на Институтот за безбедност, одбрана и мир при Филозофскиот факултет од Скопје и Факултетот за безбедност од Универзитетот од Белград.
„Мигрантската криза, интернационализацијата на тероризмот, односно регрутацијата на терористички борци од земјите на Балканот, натамошното разгорување на состојбите на Блискиот и Средниот Исток и сè подрските, но и пософистицирани терористички активности во Европа се предизвици и закани за кои мораме соодветно да бидеме подготвени да се справуваме. Во рамките на таквиот безбедносен контекст мора да се додаде и фактот дека Балканот, односно оној негов дел што произлезе од распадот на СФРЈ, сè уште заздравува од кризите во текот на деведесеттите години од минатиот век. Од оваа временска дистанца и низ призмата на безбедносната проблематика се наметнува заклучокот дека на Балканот многу повеќе работи нѐ поврзуваат и упатуваат едни кон други отколку што нѐ раздвојуваат или туркаат во некакви табори. Заедничката соработка, особено во безбедносната сфера, е нужност без која практично е невозможно успешното справување со глобалните закани, како што се, на пример, миграциите или борбата против тероризмот“, рече Спасовски.
Ваквите научни и стручни собири, како овој исклучително значаен собир овде во Охрид, според Спасовски, се конкретна контрибуција во детектирањето, појаснувањето и дефинирањето на безбедносните предизвици и одредници пред кои сме исправени сите ние во регионот. Министерот Спасовски им посака успешна и плодна работа на учесниците на овој еминентен научен собир потенцирајќи дека е убеден оти идеите, анализите и размислувањата изнесени овде ќе најдат и своја практична имплементација во заедничките напори за континуирано градење квалитетен и ефикасен безбедносен систем од кој сите ќе имаме полза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.