Daily news
Османи на средба со Хан: Балканот е под влијание на европски оптимизам
Заменик претседателот на Владата задолжен за европски прашања, Бујар Османи присуствуваше на тринаесетата конференција на европски градови и региони на тема „Наредната генерација на нови земји – членки на ЕУ“, во организација на Институтот на регионите на Европа, што се одржи во Салцбург, Австрија.
На конференцијата се говореше за перспективите на земјите од Западен Балкан во контекст на политиката на проширување на ЕУ, при што, носечки говорник на конференцијата беше еврокомесарот за проширување, Јоханес Хан. Како панелисти учествуваа и заменик- претседателите на влади и министри задолжени за европска интеграција кои доаѓаат од земјите на Западен Балкан, образложувајќи ја притоа секој од нив состојбата со евроинтегративните процеси во сопствената земја, виз-а-ви процесите во регионот.
Вицепремиерот Османи, заедно со останатите министри од регионот задолжени за ЕУ остварија неформална средба со еврокомесарот Хан, на која секој од министрите имаше простор за размена на мислења со еврокомесарот, но и со останатите министри. На средбата, Османи го информираше еврокомесарот за напредокот на Република Македонија во откочувањето на евроинтегративните процеси, имплементацијата на Планот 3-6-9, како и напредокот на земјава во односите со соседите. Во истата насока, Османи ги реафирмираше позициите дека Македонија останува посветена на процесот и натаму и дека очекува таа посветеност да резултира со соодветен одговор и од страна на Унијата.
Вицепремиерот Бујар Османи имаше и свое обраќање на самата конференција, каде се осврна на најголемите предизвици за реформирањето на земјата по промената на власта. „Централна точка на новото политичко мнозинство, а со тоа и на нова Влада, се реформите и посветеноста кон евроинтегративните процеси“, истакна Османи. Тој додаде дека во првите 100 дена, членството во ЕУ било врвен приоритет за Владата, за што бил изготвен и Планот 3-6-9 во кој се содржани сите мерки и активности кои Владата се обврза да ги спроведе во рок од три, шест и девет месеци. Османи посочи дека реформите се спроведуваат според планираната динамика, најавувајќи дека се подготвува и „терен“ за спроведување и на подолгорочни реформи со кои ќе се обезбедат одржливи резултати и ќе се задржи фокусот на Владата кон европските интеграции.
Во своето обраќање, Османи посочи и на напредокот во затворањето на отворените политички прашања. „Со нашиот сосед, Република Бугарија, потпишавме историски Договор за добрососедство, притоа, без присила и без во тоа да бидат вклучени меѓународни посредници, што ќе се согласите, претставува реткост на Балканот“, изјави Османи во своето обраќање. Тој додаде и дека во првите 100 дена Владата со консензус го донесе и предлог – законот за употреба на јазиците, со што се отпочна процесот на затворање и на едно од најтешките внатрешни политички прашања кои произлегуваат од Рамковниот договор.
Османи изрази задоволство и од досегашниот тек на Берлинскиот процес и истакна дека очекува позитивен импулс и од самитот во Лондон, во согласност со интересите на сите земји кои се засегнати од процесот. „Напредокот на Република Македонија во евроинтегративните процеси не го гледам како изолиран случај на Балканот, туку како составен дел од еден нов европски оптимизам во регионот, кој е проширен и во земјите членки на Унијата“, истакна Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.