Daily news
(ВИДЕО) Груевски: Атмосферата во која се одвиваат овие избори е исклучително лоша и непријатна
Атмосферата во која се одвиваат овие избори е исклучително лоша и непријатна. Веќе сме четврти ден, а зад нас има многубројни инциденти, нерегуларности, злоупотреби, за жал, од вчера и пукање и ранети луѓе и навистина тоа е многу загрижувачко во однос на одржување фер и демократски избори, изјави лидерот на ВМРО-ДПМНЕ, Никола Груевски, на заедничката прес-конференција со премиерот на Унгарија, Виктор Орбан, и претседателот на словенечката СДП, Јанез Јанша.
„На средбата со Орбан и Јанша информирав и за злоупотребите што се прават од страна на владејачката гарнитура во правец на секојдневно пуштање кривични пријави на нашите кандидати за градоначалници, со цел да го нарушат нивниот имиџ, пракса што ја започнаа еден ден откако ја објавивме листата на кандидати за градоначалници. Од тој ден па наваму, безмалку секој ден има по една кривична пријава за некои од нашите градоначалници, што укажува на неколку работи. Прво, укажува дека нашите опоненти се свесни дека ќе ги изгубат овие избори. Второ, дека се многу исплашени поради сето тоа и, трето, дека во паника спасот го бараат во неколку нефер средства и преку нерегуларни средства. Тоа прави една лоша атмосфера во земјата и тоа не е добро во однос на создавање една фер атмосфера за фер и демократски избори“, рече Груевски.
Сепак, додаде тој, и покрај тоа, ние сме убедени дека граѓаните, мнозинството, доверба ќе ѝ ја дадат на ВМРО-ДПМНЕ од повеќе причини.
„Прво, затоа што имаме далеку подобри и покомпетентни кандидати за градоначалници. Второ, затоа што во овие четири месеци граѓаните во Македонија се уверија и ја видоа разликата помеѓу ВМРО-ДПМНЕ и нашата коалиција и владеењето на Социјалдемократскиот сојуз и нивната коалиција. Видоа како ја злоупотребуваат власта, како не ги исполнуваат ветувањата што ги дадоа пред луѓето, како одат директно спротивно на волјата на граѓаните и како ја уриваат економијата во земјата преку разни начини, а еден од начините е искажувањето непожелност на странските инвеститори во Република Македонија. Сите економски показатели во последните четири месеци се исклучително лоши. И тие се само огледало на она што се случува во економијата, односно на третманот на економијата од страна на новата Влада, т.е. нејзиниот однос кон економските субјекти, особено странските инвеститори“, рече Груевски.
Тој рече дека ги информирал Орбан и Јанша, како што рече, и за огромниот притисок со кој се соочени медиумите во Македонија, судиите во судовите, администрацијата и странските инвеститори.
„Јас сум убеден дека ова помрачување што се случи во Македонија по локалните избори ќе почне да заминува, а ќе заврши конечно со предвремени парламентарни избори, на кои на власт ќе се вратат ВМРО-ДПМНЕ и коалицијата за подобра Македонија“, рече Груевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.