Daily news
Поповски ветува изградба на базен во Пехчево
Игор Поповски, кандидат за градоначалник на ВМРO-ДПМНЕ и коалицијата за општина Пехчево, порача дека со неговиот тим ќе се залагаат да обезбедат подобар живот за сограѓаните преку изградба на инфраструктура и заштита на животната средина, како и преку развој на спортскиот дух, урбанизацијата на општината и развој на туризмот.
„Граѓаните знаат дека тоа што го ветуваме и ќе го оствариме. Нашата досегашна работа е најголемиот гарант за тоа. Нашите проекти се директно решение за потребите на граѓаните, произлезени од барањата на граѓаните. Во продолжение ќе спомнам само дел од проектите на мојата програма: изградба на градски базен во Пехчево, со реализацијата на овој проект ќе се овозможи граѓаните од сите категории, од најмладите до највозрасните да уживаат во благодетите на еден од најздравите спортови, како и за поуспешно развивање на туризмот, реконструкција на кејот на Пехчевска Река во Пехчево и регулација на речното корито со што ќе се спречи излевањето на водата од коритото и поплавувањето на земјиштето, целосна реконструкција на уличната мрежа во Пехчево, односно асфалтирање и обновување на сообраќајната мрежа во градот, изградба на мост во Пехчево и поврзување на улица Првомајска со населбата Говедарник со што ќе се овозможи слободно, непречено и безбедно движење на граѓаните од едната на другата страна на реката Писа“, вели Поповски.
Тој најави и реконструкција на пристапниот пат до Панчарево со што ќе се овозможи скратување на времето на патување, доуредување на селските водоводи во с. Панчарево со што целосно ќе биде решен проблемот со водоснабдувањето и граѓаните од селото ќе пијат чиста и здрава вода, изградба на водовод во село Црник со што ќе биде решен проблемот за добивање чиста и здрава вода за пиење, реконструкција на локалниот пат Чифлик-Умлена-Робово за обезбедување поголема безбедност и олеснет пристап на населението и изградба на нови 4 улици во село Робово и село Умлена со што ќе се обезбеди полесен пристап и безбедни улици.
„Програмата што ја нудиме е реална, остварлива и базирана исклучиво на потребите и барањата на жителите на општина Пехчево. Затоа без сомнение нашата општина ќе ја направиме современа и ќе биде едно прекрасно место за живеење во Македонија, а секако и атрактивна туристичка дестинација. Секогаш работа, секогаш Пехчево, секогаш Македонија е нашиот слоган. Работата е на прво место, потребите на граѓаните се наш приоритет“, изјави Поповски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.