Развојната траекторија на МАНУ потврдува дека уште од првите децении по формирањето, Академијата навлегла во фазата на својата зрелост и израснала во темелник на македонската наука, јазик, култура и историја и во еден од стожерите и симболите во државноста на Македонија. МАНУ придонесе за конституирањето на Македонија во независна држава, истакна претседателот на МАНУ, Таки Фити, на одбележувањето на 50-годишнината од основањето на Академијата.

Пој порача дека Македонија била и е мултикултурна земја, но и дека е потребна изградба на нов и обединет Балкан. Фити го поздрави договорот за пријателство и соработка на Владата на Македонија со Бугарија.

„Директната соработка на академиите во регионот на планот на заедничката проектна активност, изработка на стратегии од значење за регионот и издавачката дејност е посебно значајна за развојот на сите“, додаде тој.

На собирот во МАНУ присуствуваа претседателите на академиите од Србија, Хрватска, Босна и Херцеговина, Турција, Косово, Албанија, Бугарија, Словачка, Чешка, Австрија и од Унгарија. Фити се осврна на 1967 година кога било решено да се формира Академијата. Тој зборуваше за развојот на МАНУ во овој период, предизвиците со кои се соочува денес, за идните планови. Со одлука на Претседателството на МАНУ беа врачени три посебни признанија и медали што го носат ликот на првиот претседател, Блаже Конески. Наградени беа Радомир Ивановиќ од Црна Гора, Бенџамин Лангер од Германија и Виктор Фридман од САД. Беа доделени плакети и благодарници на истакнати институции, организации и компании со кои соработува МАНУ, на универзитетите од Република Македонија, научни друштва, организиации.

Претседателот Иванов, кој е покровител на свечената академија, во обраќањето истакна дека како врвна самостојна научна и уметничка установа МАНУ даде голем придонес во изградбата на современата македонска држава, континуирано ја поттикнува и ја развива научната мисла и работи на негувањето и на унапредувањето на уметностите.

Во нашето општество, во кое политичарите честопати размислуваат само до следните избори, на академиците е да промислуваат за наредните генерации. Затоа, неопходно е функционално партнерство меѓу државата и науката, меѓу носителите на одлуки и експертите, со цел носење мудри одлуки и креирање политики втемелени врз научна основа, рече Иванов. Според него, одговорност на МАНУ е да настојува преку научната мисла да придонесува за унапредување на севкупниот развој на земјата и за процут на целото македонско општество.

Претседателот вели дека македонската држава и македонските граѓани се исправени пред големи предизвици за кои мора да се бараат решенија. Но, тие решенија не смеат да отстапуваат од принципите на нашето постоење и опстанување, рече тој, оценувајќи дека во овој период на предизвици очите на македонското општество се свртени кон МАНУ и дека очекувањата Академијата да биде глас на разумот и на мудроста се поголеми отколку кога било порано.

„Длабоко верувам дека во годините и децениите што се пред нас МАНУ ќе покаже единство во однос на суштинските прашања за државата, блискост и отвореност кон граѓаните и мудри решенија и одлуки за важните прашања од кои зависи иднината на нашите потомци“, додаде Иванов.

Во рамките на одбележувањето, покрај музичката програма, на свечената академија беше прикажан и филмот „50 години МАНУ“. Македонската академија на науките и уметностите е основана на 23 февруари 1967 година, а нејзин прв претседател беше Блаже Конески. Досега МАНУ имала 154 члена, од кои сега 41 се со статус редовни членови, а 33 се со статус членови надвор од работниот состав. МАНУ има издадено приближно 1.690 научни труда од сите сфери на науката и уметностите.