Daily news
Лајонс-клубот „Десарети“ – Охрид одбележа 10-годишнина од своето постоење
Неодамна Лајонс-клубот „Десарети“ – Охрид одбележа 10-годишнина од своето постоење. На овој мошне значаен јубилеј присуствуваа еминентни претставници од „ЛД 132 Македонија“, актуелниот гувернер и неговиот заменик, поранешни гувернери, претставници од повеќе ЛК од земјата, претставници од „Ротари“ и други гости љубители на хуманоста.
Хуманата идеја на Мелвин Џонс, која од 1917 година до денес се шири во целиот свет веќе 100 години, изразено преку Лајонс-движењето, им покажува на сите дека, доколку некој прави одредена работа со цело срце и душа, тогаш секој идеал може да биде достижен.
Започнувајќи скромно, ненаметливо од пред 100 години, денес Интернационалната организација на Лајонс-клубови – ЛЦИ, како најголема светска сервисна организација, на глобално ниво брои повеќе од 1.350.000 члена, здружени во повеќе од 46.000 клуба, собрани со една идеја – да се подобри живеењето во своите заедници.
Лајонс-клубот „Десарети“ – Охрид се етаблира и почна да одржува состаноци уште од мај 2007 година, а неговото официјално основање и чартер-вечерта беше одржана на 22 септември 2007 година во хотелот „Милениум палас“ во Охрид, место каде што клубот ги започна своите активности и имаше свое седиште. Денес клубот има свое седиште во хотелот „Ројал вју“ во Охрид, а своите состаноци ги одржува секој втор и четврти понеделник во месецот, со почеток во 20.30 часот.
Лајонс-клубот – „Десарети“ од Охрид е дел од таа голема фамилија на Интернационалната организација на Лајонс-клубови. Целата успешна приказна започна кон крајот на март и почетокот на април 2007 година преку ентузијазмот и големата желба на неколкумина филантропи од Охрид – подоцна основачи на клубот, а иницирани од кумот на клубот, Јордан Савески, првиот претседател на ЛК „Десарети“, Габриела Ракичевиќ, и Горан Нелоски, во тоа време секретар на кумскиот ЛК „Вардар – Скопје“.
Јордан Савески е еден од основачите на лајонизмот во Република Македонија, кој е член на Лајонс-клубот „Вардар“ од Скопје, а подоцна и гувернер на „ЛД 132 Македонија“, тој покрај идејата за формирање на клубот, го предложи и името на клубот – ЛК „Десарети“, име што асоцира на регионот од каде што овој клуб доаѓа и каде што функционира, име што по 10-годишното постоење веќе е препознатлив бренд не само во домашни туку и во светски рамки поради својата успешна работа, посветеност, акции, специфицноста, оригиналноста и корисноста во општественото живеење.
Во своите 10 години постоење овој клуб има направено многу за својата заедница, преку многубројни акции, донации, учества во хумани мисии, организирање конгрес на Лајонс-клубови од градови што имаат тврдини. Во оваа пригога најдобро е да зборуваат делата што ги имаат овековечено овие значајни настани, настани за историја, кои ги сведочат овие свечени мигови за целиот клуб и неговите членови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.