Европа
Австрија повикува ЕУ да испрати војници во Грција
Европската унија би требало да испрати група војници и цивили кои ќе ѝ помогнат на грчката гранична полиција, бидејќи европската агенција за границите Фронтекс е „пребавна“, изјави во понеделникот австрискиот министер за одбрана, Ханс Петер Доскозил.
Подоцна, неговиот портпарол за новинарите појасни дека австрискиот министер предлага „преодна мисија“ којашто ќе ги регистрира мигрантите во Грција или ќе ги враќа во матичните земји сé додека Фронтекс не биде целосно подготвен за спроведување на договорот меѓу Европската унија и Турција кој би требало да го запре натамошниот прилив на бегалци и мигранти во Европа.
„Фронтекс досега беше одговорен за заштитата на надворешните граници на ЕУ, но е пребавен поради својот начин на работење. Затоа предлагаме (…) да се изнајдат заеднички решенија низ соработка со министерствата за надворешни и за надворешни работи“, додаде австрискиот министер за одбрана, Ханс Петер Доскозил во текот на започнатата дводневна посета на соседна Словенија.
Додаде дека за предлогот ќе разговара на средбата на министрите за одбрана на централна Европа, којашто идната седмица ќе се одржи во австриската престолнина Виена.
ЕУ предложи сили со околу 4.000 луѓе под надзор на Фронтекс, кои ќе вклучуваат судии, преведувачи и граничари, за да ѝ се помогне на Грција во решавањето на илјадниците барања за азил.
Грција прими околу 43.000 мигранти и бегалци кои во понеделник и натаму пристигнуваа и покрај договорот меѓу ЕУ и Турција кој стапи на сила во неделата, 20-ти март, со кој треба да се спречи илегалниот прилив на мигранти во земјите на ЕУ.
Според договорот меѓу ЕУ и Турција, сите имигранти и бегалци, вклучително и Сиријците кои бегаат од војната, коишто илегално ќе влезат во Грција преку поморскиот пат од неделата 20-ти март па натаму, ќе бидат вратени во Турција по регистрирањето и разгледувањето на нивното барање за азил. За возврат, ЕУ ќе прими за секој вратен Сириец по еден директно од Турција, вкупно 72.000 луѓе. Покрај тоа, Турција ќе добие и двојно зголемена од првично договорената помош – вкупно 6 милијарди евра, забрзување на постапката за укинување на визите за нејзините државјани околу јуни и заживување и забрзување на турските пристапни преговори.
Појаснувајќи ја изјавата на Доскозил за посебните сили, неговиот портпарол рече дека „Тоа би требало да биде воена мисија на ЕУ за брзо спроведување на одлуките на Европскиот совет. Фронтекс мора да вработи 4.000 луѓе. Можеме да претпоставиме дека ќе биде потребно време додека Фронтекс не обезбеди толкав број луѓе“, додаде./крај/мф/сн
Извор: STA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.