Daily news
ДПА ќе предложи закон за официјализирање на албанскиот јазик
Демократската партија на Албанците ќе предложи закон за официјализирање на албанскиот јазик. Пратеничката од оваа партија Мерал Узеири на парламентарната Комисија за политички систем соопшти дека ДПА го смета како недоволен предлог-законот за употреба на јазиците, кој е во собраниска постапка.
ДПА го изгласа првото читање на предлог-законот за употреба на јазиците, а на второто читање не предложи амандмани за истиот.
Мендух Тачи и Бардуљ Даути се предлагачи на законот за реализирање на рамноправноста на службените јазици и писма во Република Македонија, кој влезе во собраниска процедура. Во понеделник овој предлог треба да се најде и на пленарна седница.
„Со предлог-законот за реализирање на рамноправноста на службените јазици и писма во Република Македонија во законска рамка ќе биде уредена рамноправност на службените јазици со што статусот на македонскиот јазик и албанскиот јазик, како и нивните писма, како службени јазици во Република Македонија, ќе биде ист, односно рамноправен и воедно користењето во сите институции ќе биде исто. Со предлог-законот ќе се уредат и правата на сите заедници во Република Македонија за зачувување, заштита и промовирање на нивниот јазичен идентитет и Република Македонија ќе добие мултијазичен карактер, како културна и историска вредност“, се наведува во предлог-законот.
Во него е предвидено дека „македонскиот јазик и албанскиот јазик и неговото писмо (азбука) се службени јазици во Република Македонија и имаат рамноправен статус при нивната примена во сите институции.
Според член 2, во Република Македонија се обезбедува рамноправноста на македонскиот јазик и албанскиот јазик и неговото писмо (азбука). Сите граѓани на Република Македонија имаат рамноправни права во однос на употребата на службените јазици во сите државни институции.
Член 3 предвидува дека на општинско ниво, другите јазици на заедниците, како турскиот, ромскиот, српскиот, бошњачкиот јазик, ќе бидат јазици во службена употреба, според условите определени со закон.
Според член 4, во општините населени од една заедница, чијшто мајчин јазик не е службен јазик и која претставува најмалку 10% од вкупното население на истата општина, јазикот на таа заедница ќе има статус на службен јазик во таа општина и ќе се употреби на еднаков начин како и службените јазици.
Институциите во Република Македонија ќе обезбедат јазични права на граѓаните кои се дел од заедниците чијшто јазик не е службен, во согласност со одредбите на овој закон.
Понатаму, се предлага сите државни институции, јавните претпријатија, управите, агенциите и органите во нивен состав, органите на локалната власт, како и сите органи кои вршат јавна дејност, во работењето, комуникациите и службената постапка се должни да го применат начелото на рамноправност на јазиците и неговото писмо утврдени со членовите 1 и 2 од овој закон.
„Секому му е гарантирано правото во постапка пред суд или пред други државни органи кои во вршењето на нивните јавни овластувања одлучуваат за правата и обврските на граѓаните да го употребат својот мајчин јазик во таа постапка и да биате запознаени со фактите на својот јазик“, се предлага во членот 6.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.