Daily news
Мицкоски најави формирање два нови совета во ВМРО-ДПМНЕ
Новиот лидер на ВМРО-ДПМНЕ, Христијан Мицкоски, најави внатрешно реконструирање, нов извршен комитет и формирање две нови партиски тела – совет на извршниот комитет и совет на претседателот.
„Политиката е динамичен процес и процес во кој мора да воведувате нови пракси и практики, а дел од тие практики ќе се обидеме да примениме во периодот што следува. Преку внатрешното реконструирање новиот извршен комитет, дел од партиските комисии, кои исто така ќе бидат значаен фокус на ВМРО-ДПМНЕ, потоа двете новоформирани тела, кои како претседател ќе ги предложам, тоа е советот на извршниот комитет и советот на претседателот, а овие сите во една синергија заедно со секретаријатот, кој ќе биде дел од новиот генерален секретар на партијата, ќе формираме едно тело што ќе донесе нов квалитет на политичката сцена во Македонија и ќе понуди една нова надеж“, рече Мицкоски на вечерашното интервју за МРТ.
Тој вели дека во советот на извршнот комитет ќе членуваат луѓе од академската заедница, од општествениот живот, кои ќе учествуваат во работата на извршниот комитет во советодавна функција. Тие ќе треба да нудат нови модерни решенија за партијата, проекти и анализи за актуелните случувања во државата.
„За членови на советот на претседателот на партијата веќе поканив неколку мои колеги од странство, од западноевропските земји, академици, кои ја прифатија мојата покана. Тие луѓе ќе треба да подготвуваат компаративни анализи за случувањата во Македонија со состојбата во нивните земји“, рече Мицкоски.
Новиот лидер на ВМРО-ДПМНЕ вели дека со потписниците на иницијативата за одложување на вонредниот партиски конгрес има одлична комуникација, дека не гледа никаков проблем во тоа и дека овие луѓе се исклучителни личности кои многу сториле за партијата и дека и натаму се добредојдени.
„На координација, која не е задолжителна, доаѓа Илија Димовски, односно најчесто доаѓа, беспрекорно функционираме“, истакна Мицкоски. Тој појасни дека Влатко Ѓорчев е привремен координатор на пратеничката група и набргу ќе се знае кој од пратениците ќе ја преземе оваа функција.
Тој додаде дека во моментот се води внатрепартиска дебата со пратеничката група за тоа како да дејствува понатаму, а се разговара и за предлагање за донесување закон за амнестија насочен главно за ослободување на притворените патриоти кои се зад решетки како резултат на политичкиот прогон на актуелната власт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.