Daily news
(Видео) Заев за грчката „Алфа ТВ“: Немаме црвени линии
Премиерот Зоран Заев, во интервју за грчката „Алфа ТВ“ изрази надеж дека постои можност за изнаоѓање на решение за прашањето за името до крајот на првата половина во 2018 година. Тој вели дека „црвените линии“ нема да бидат причина или изговор за ограничување на разговорите.
Заев во интервјуто изрази уверување дека опозицијата во Македонија ќе даде позитивен придонес во изнаоѓањето на решение со Грција, истакнувајќи ја потребата заеднички да го решаваат ова прашање.
Тој ја опишува како „позитивна надеж неодамнешната изјава на лидерот на Независни Грци Панос Каменос, дека ако постои договор на политичките институции на двете земји, и тој ќе се согласи на решение“. Заев во интервјуто изразува желба да се сретне со министерот за одбрана и претседател на најголемата опозициска партија Нова демократија , Киријакос Мицотакис, но се разбира, како што вели тој, по средбата со премиерот Алексис Ципрас.
Запрашан за црвените линии, Заев вели дека ако постојат црвени линии тие би биле само кочница или блокада во изнаоѓањето на решение.
„Наша црвена линија е линијата која свети силно како водилка по патот за да дојдеме до конечно решение“, вели Заев.
Тој вели дека со Ципрас веруваат во исти вредности. „Ние сме родени во иста година, и очигледно Господ сакал да бидеме родени иста година за да можеме да го решиме ова чувствително прашање што постои помеѓу двете земји“, вели тој.
Во интервјуто, Заев вели дека власта е подготвена да разговара за преименувањето на аеродромот во Скопје, со што, како што рече, ќе се покаже неговото пријателство со Грците.
Тој повтори дека Македонија не е единствен наследник на Александар Велики истакнувајќи:
„Јавно го кажав тоа, бидејќи повеќе сакам да верувам во иднината на нашата држава отколку да бидеме вкоренети со предрасудите од минатото, затоа што знам дека Александар Велики ќе биде еден елемент што ќе нè обедини, а не елемент на поделба“.
Премиерот во интервјуто неведува дека стратешка цел на Македонија е влез во ЕУ и НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.