Daily news
Заев најавува интензивни средби за името во текот на месецот
Очекувам неколку средби за името што побргу. Времето е кратко, треба брзгу да дејствуваме. Јас се надевам уште идната недела, под раководство на Метју Нимиц, дека ќе се одржи состанок помеѓу двајцата министри како ново ниво на преговарачкиот процес што е договорен, изјави премиерот Зоран Заев по прес-конференцијата со спортските работници одговарајќи на новинарски прашања дали се очекува месецов да се оствари нова средба со Грција на министерско ниво.
Според Заев, средбите продолжуваат, а според најавите на грчкиот министер Никос Коѕијас, можно е да има нацрт-верзија на некој меѓународен договор. „Ние рековме дека ќе ги искористиме сите алатки. Процесот се одвива преку Обединетите нации и преку Метју Нимиц. Но, кога ќе се сретнат двајцата министри, кога ќе се сретнат двајцата премиери, зошто да не го искористиме тоа како можност? Зошто ако некој инвентивен елемент постои, да не биде како можност? Ако се дојде до некоја нацрт-верзија на меѓународен договор, каде што е штиклирано тоа што апсолутно не е спорно, а има такви работи, а сè друго би било предложувано, како се договара или решава да биде влезено внатре, на крајот ова треба да заврши со меѓународен договор. Таквата идеја или предлог за мене е добредојдена и може да биде од помош. Сè спаѓа во моментна дебата и дискусија. Што и да решиме, да вратиме преку Метју Нимиц, кој го води преговарачкиот процес затоа што на крајот треба да биде формализиран преку ОН, вели Заев.
Во однос на тоа дали Атина бара промени на некои членови од македонскиот Устав, Заев вели: „Секако, знаете дека дел од ставовите на ерга омнес во Грција е промена на Уставот во Македонија. И тоа се ставови на Грција. Ние имаме наши ставови. Значи, зборувам за Уставот. Македонија го промени Уставот во 1993 година, да го допрецизира членот 49 од него, вградувајќи амандман 2. И ние направивме голем чекор како земја таа година за да го отстраниме иредентизмот. Во моментот сè што правиме е да докажеме дека Македонија нема никакви аспирации, територијални или какви било. Македонија нема иредентистички побуди, Македонија сака да гради пријателство. И од тој аспект не ги гледам потребите. Јас внимателно го слушам и нашиот партнер со кој преговараме, но апсолутно знам што е возможно и што е невозможно во Македонија. Зборувам на тој начин за да дадам шанса на преговарачкиот процес. Апелирам да имаме транспарентна постапка, но и внимателност. Многу е важно да успееме. Реков, не по секоја цена. Драго ми е што односот во Грција е пријателски, барем на раководството на државата, зборувам и за власта и за опозицијата. Секако, постојат и радикални структури и тука и во Грција, но треба да направиме сè да се изнајде решение за да градиме во иднина и билатерално и регионално пријателство со сите“.
„Ќе направиме сè за да најдеме решение на овој горлив дваесет и петгодишен проблем, но не по секоја цена“, дециден е Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.