Daily news
Идентификуван убиецот што застрела момче во Чаир, МВР распиша потерница по него
Полицијата го идентификува убиецот што застрела момче во Чаир во декември минатата година. Според информациите на МВР, по него е распишана потерница.
Секторот за внатрешни работи – Скопје, по преземени мерки и активности во минатите два месеца, денеска поднесе кривична пријава против О.А. (28) од Скопје поради основи на сомнение дека извршил кривично дело убиство.
На 20 декември минатата година околу 17.30 часот на улицата Џон Кенеди во скопски Чаир пријавениот со автоматска пушка „АК 47“ истрелал повеќе проектили кон Б.И. (24) од Скопје, кој подоцна истиот ден од добиените повреди починал на Ургентниот центар „Мајка Тереза“.
„Според документираните сознанија, пред кривично-правниот настан Б.И. имал претходен договор со свои тројца другари да се сретнат на автобуска постојка на улицата Џон Кенеди. Кога пристигнале на договореното место, почнале да разговараат, при што по неколку минути на истата улица, но од спротивната страна на коловозната лента, пред браварска работилница застанало патничко моторно возило ‘југо’ во црвена боја и од него излегол О.А. ,кој во рацете држел автоматска пушка. Претрчувајќи ја коловозната лента, пријавениот се приближил до лицата и без никакво предупредување почнал да пука во правец на Б.И., кој од добиените повреди паднал на земјата крвавејќи. По ова, пријавениот се вратил во возилото ‘југо’ и заминал од местото на настанот“, велат од МВР.
Од таму додаваат дека „југото“ било пронајдено неколку часа по убиството и дека биле обезбедени видеоснимки од поставени видеонадзори во близина на местото на настанот. На информативни разговори во полиција биле повикани триесетина лица. На 27 декември биле извршени претреси во домот и други простории кај пријавениот О.А. на улицата Џон Кенеди, како и кај други пет лица, сите од Скопје, при што одземени се два мобилни телефонски апарата, кои по наредба од Основно јавно обвинителство Скопје – Скопје се доставени во Секторот за компјутерски криминал и дигитална форензика, а било извршено и полиграфско тестирање на три лица.
Од МВР информираат дека пријавениот О.А не им е достапен на органите на прогонот и за него од страна СВР- Скопје распишана е потерница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.