Daily news
Димитров во Минхен: Македонија важна тула во куќата на регионалната стабилност
Во рамките на активностите за време на Минхенската безбедносна конференција, министерот за надворешни работи, Никола Димитров денеска учествуваше во дискусиите за континенталната безбедност, глобалните предизвици и иднината на трансатлантските односи.
„Република Македонија е важна тула во куќата на регионалната стабилност и безбедност. Ние сакаме да учествуваме и придонесуваме кон напорите и процесите за заедничка европска иднина за регионот, растеретена од несигурност и непредвидливост“, потенцираше министерот Димитров во разговорите со учесниците на Конференцијата.
На маргините на настанот, Министерот оствари повеќе билатерални средби. На средбата со министерот за надворешни работи на Република Чешка, Мартин Стропницки беа разменети мислења за важноста на европската и евроатлантската интеграција на Република Македонија.
Во разговорот со норвешкиот МНР, Ине Ериксен Сореиде беше изразено задоволство и благодарност за дуплирањето на реформската помош за Македонија и за поддршката на нашите стратешки приоритети. Министерот Димитров посочи дека членството во НАТО е важно за Република Македонија, но и за Балканот и Европа.
На средбата со министерот за надворешни работи на Јапонија, Таро Коно, прва меѓу двајцата Mинистри, заеднички беше поздравено интензивирањето на билатералните односи, особено по отворањето на резидентните амбасади во Токио и Скопје. Беше поздравена јапонската иницијатива за соработка со Западен Балкан и беше упатена покана до aмбасадорот надлежен за земјите од Западен Балкан да ја посети Република Македонија. Истовремено беа разгледани модалитетите за унапредување на техничката соработка во функција на стимулирање поинтензивна проектна активност. Министрите разменија мислења за регионалните и глобалните безбедносни предизвици и потребата од адекватен колективен одговор во рамките на ОН.
Со министерката за надворешни работи, правда и култура на Лихтенштајн, Аурелија Фрик, се разговараше за модалитетите за унапредување на меѓусебните односи, со фокус врз мултилатералната соработка.
Министерот Димитров оствари средба и со пратеникот на грчката опозициска партија Нова демократија, Јоргос Кумуцакос кој во партијата е одговорен за надворешна политика. На средбата беа разменети мислења за актуелните динамики и за процесот за надминување на разликата околу името.
На покана од премиерот на Баварија, министерот Димитров присуствуваше и на Државната вечера, приредена по повод Минхенската конференција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.