Унгарскиот премиер Виктор Орбан во интервјуто за саботното издание на германскиот дневен весник Bild предупреди дека доколку не сопре сегашниот прилив бегалци христијаните во Европа ќе станат малцинство, а Европската унија ќе го загуби својот идентитет, а како план за решавање на кризата предложи план според кој 3 милијарди евра би им биле донирани на земјите коишто граничат со Сирија каде што се згрижени милиони сириски бегалци.

„Европските политичари во моментов живеат во свет од сништата. Тие не ја сфаќаат опасноста, каква што за нас ја претставуваат дојденците. Тие не ги сфаќаат димензиите на проблемот, станува збор за десетици милиони луѓе. Потокот (бегалци) е бескраен, од Пакистан, Бангладеш, Мали, Етиопија, Нигерија… Доколку сите ги пуштиме, Европа ќе исчезне“, предупредува унгарскиот премиер.

„Како резултат на миграцијата муслиманите во блиска иднина ќе станат мнозинство во Европа. Доколку Европа го толерира ривалството на двете култури, тогаш христијаните ќе загубат“, смета Орбан.

Според него, за да се зачува културниот идентитет на Стариот свет неопходно е „да се престане да се им дозволува на муслиманите доселување во Европа“. „Сепак, за тоа европските политичари за тоа неволно зборуваат“, вели Орбан за Bild.

Тој, меѓу другото, ја критикува германската канцеларка Ангела Меркел за нејзината изјава дека прописите на ЕУ не функционираат и го дозволи влезот на сите бегалци од територијата на Унгарија во Германија. Според европските прописи, сите мигранти и бегалци треба да бидат регистрирани во земјата во којашто прва ќе влезат на територијата на ЕУ, а тие тоа го одбиваат во Унгарија и не сакаат да одат во прифатните центри. „Тоа предизвика хаос кај нас. Тоа се случува кога ќе се прекршат правилата“, вели Орбан и додава дека мигрантите и бегалците почнале да се конфронтираат со полицијата одбивајќи да бидат регистрирани и идентификувани, и нивната цел е што поскоро да заминат за Германија.

Во продолжение од интервјуто за германскиот весник, унгарскиот премиер Виктор Орбан вели дека за решение за бегалската криза го предлага планот за помош од три милијарди евра за земјите коишто граничат со Сирија, којашто во моментов е најголемиот извор на мигранти.

„Имаме план, ќе им го изложам на шефовите на Европската унија на следниот состанок, и тој предвидува голема финансиска поддршка за земјите кои граничат со Сирија, како Турција, Либан и Јордан“, предлага Орбан.

Досега сириските бегалци кои бегаат од војната која трае во нивната земја од март 2011 година бегаа претежно во споменатите три соседни земји, кои примија околу 4 милиони бегалци. Меѓутоа, таа тенденција се промени последните месеци и сé повеќе од нив се упатуваат кон Европа.

Конзервативниот унгарски премиер, кој е еден од европските челници поборници на тврдата линија во однос на мигрантите, предложува план од „три милијарди евра“ за овие три земји. „Доколку се потребни повеќе пари, ќе ја зголемиме помошта, сé до запирањето на приливот на мигрантите“, додава Орбен.

„Тие бегалци не доаѓаат од воените подрачја, туку од логорите во соседните земји. Таму се сигурни. Значи тие луѓе не бегаат од опасноста“, смета Орбан според кој бегалците не доаѓаат во Европа бидејќи сакаат безбедност, туку затоа што сакаат подобар живот отколку во логорите. „Го сакаат германскиот живот, можеби шведскиот“, заклучува.

Запрашан дали би примил мигрантско семејство во својот дом, Орбан одговори „Да, доколку мигрантите тоа не би го сфатиле како охрабрување да дојдат во Европа. Тоа не би било пожелно во овој момент“. Додава дека неговата сопруга и децата веќе активно им помагаат на бегалците.

Повеќе од 170.000 мигранти ја минаа досега унгарската граница од Србија годинава. Многумина одбиваат да бидат регистрирани во Унгарија, стравувајќи дека би можела да запната таму или да бидат вратени во оваа земја подоцна на своето движење низ Европа./крај/мф/сн

Извор: Макфакс