Daily news
Татко моли за помош да не го одделуваат од болната ќерка која е на лекување во Турција
Велешанец моли за помош да не го одделуваат од болната ќерка која е на лекување во Турција, откако тамошните власти попладнево сакаат да го депортираат во Македонија. Александар Здравевски, чија двегодишна ќерка под итно мораше да се лекува во болница во Истанбул денеска на социјалните мрежи сподели апел за помош, барајќи македонските институции да му помогнат за да остане во Турција. Тој во моментов се наоѓа на аеродромот во Истанбул, заедно со емигранти од повеќе земји, и таму ќе остане се до утре во 16 часот кога има лет за Македонија. Неговата сопруга и ќерката успеале да обезбедат документи за да останат во Истанбул, но Здравевски, поради тоа шт не успеал навреме да го пријави престојот во општината ќе мора да ја напушти земјата.
Неговите пријатели и познаници на социјалната мрежа Фејсбук му нудат помош на таткото, кој е очаен поради одлуката за депортација. „Колку неморал и нечовечност треба да има човек за да депортираат родител кој оди во болница за да си го спаси сопственото дете“, напиша Здравевски на Фејсбук.
Сите му нудат помош на семејството, а оние кои што зборуваат турски јазик, се нудат да се јават во конзулатот во Истанбул за да се разреши случајот.
За немилата случка со семејството Здравевски се запознати и во македонското Министерство за надворешни работи. Оттаму велат дека е воспоставен контакт меѓу конзулатот и таткото и се оечкуваат подетални информации зошто тој е задржан на аеродромот за да биде депортиран во земјава.
Според објавата на фејсбук профилот на Здравевски тој со сопругата и ќерката заминал за Турција попладнето на 8 февруари. Дозволен им бил двомесечен престој поради лекување на детето во Турција. Пред две недели кога биле на контрола, тврди дека на им дале да потпишат ливчиња дека ќе одат општината за да се пријават. „Но ние слетавме вечерта на 8 февруати околу 21 часот, се сместивме и наредниот ден бевме на контрола во болницта, која ја напуштивме вецерта во 21 часот.Не ни знаевме дека мораме да се пријавиме во општината, а и да знаевме немавме време за тоа“, пишува Александар на Фејсбук.
Тој во преписката на социјалната мрежа со граѓаните кои му нудат помош, вели дека не успеал ниту да се збогува со најблиските, заминал без јакна, а на аеродромот немал никаква права, ниту преведувач. Го оставиле без храна и вода четири часа, барал да му се озвоможи телефонски да разговара, но и тоа не му било дозволено.
На малата Јана Здравевска од Велес родена во 2015 година на 1 годишна возраст и е дијагностицирано AML (акутна мијелоидна леукемија). На клиниката за детска онкологија во Скопје по примена хемо терапија Јана ја совлада болеста, но по само 5 месеци истата се врати и Јана беше испратена на трансплатација на коскена срцевина во болницата Газиосман паша во Истанбул. Целокупниот процес околу трансплатацијата ги покри Фондот за здравство.
Јана успешно ја помина трансплатацијата, но треба да прави контроли на секои 2 месеци во истата болница во Турција, кои чинат по 2.500 евра, за кои се собираа средства преку донации.
„Мислев дека сум се соочил со сите неправди на овој суров свет. Но сега су затворен на аеродром во Истанбул заедно со емигрантите од Пакистан, Сирија, Ирак… Тука треба да престојувам до утре до 16 часот кога има авион за Македонија и да бидам депортиран. Побарав да добијам преведувач – не добив, храна и вода им барав 4 часа, за на крај да морам да викам дека сум дијабетичар за да ме сфатат дека цел ден немам ниту јадено, ниту пиено ништо. Каде да се обратам јас во овие моменти, каде да го пронајдам нашиот амбасадор или конзулат, кои што би требало да им служат и помагаат на државјаните на Република Македонија во вакви тешки моменти. Немам повеќе што да кажам и за ова едвај собрав сила“, напиша Здравевски во апелот на Фејсбук.
Тој утре сепак ќе мора да се врати во Скопје, да ја тргне „забраната“ во турската амбасада во земјава, по што очекува да му биде овозможено повторно да биде со своите најмили. „Благодарност до конзулот во Истанбул кој даде се од себе за да помогне, но тоа е тоа. Ссе надевам дека ќе ме чека мојата хероина и да ја водиме битката заедно“, порача Александар.
Д.Т.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.