Daily news
Светска премиера во Женева: „шкода вижн X“ комбинира природен гас, бензин и електричен погон
Чешкиот производител „Шкода“ на Саемот за автомобили во Женева ја претстави иднината на автомобилскиот свет. Имено, овој автомобилски производител првпат презентира возило со CNG (компресиран природен гас), бензин и електричен погон. Новиот СУВ-дизајнерски јазик, „шкода вижн X“, исто така има нов конфигуриран хибриден систем. Особено одржливиот погонски концепт со комбинација на CNG/електричен мотор обезбедува спонтана испорака на енергија, зголемена агилност и ниски емисии на јаглероден диоксид од 89 грама на километар. „Вижн X“ се движи со погон на предни, задни или четири тркала по потреба.
„Во ‘Шкода ауто’ развојот и подготовките за мобилноста на иднината се во полн замав“, вели Кристијан Струбе, член на одборот за технички развој на „Шкода ауто“. „Со хибридниот концепт ‘шкода вижн X’ отвораме поглед кон иднината на нашите модели. CNG-возилата се чисти и евтини. Покрај тоа, со хибридот нашите клиенти може да искусат возење со нулта емисија“, додава тој.
Исклучително одржливиот концепт на урбаниот кросовер на FlexGreen е нагласен со импресивна комбинација на CNG (компресиран природен гас), бензински мотори и двата електрични мотора.
Моторот со внатрешно согорување е 1,5-литарски TSI G-TEC четирицилиндричен турбомотор, специјално дизајниран за употреба со CNG (компресиран природен гас). Уредот CNG произведува максимална моќност од 96 kW (130 hp) и максимален вртежен момент од 250 Nm. Еден CNG-резервоар се наоѓа под задното седиште, а вториот е позициониран зад задната оска. CNG-единицата ја движи предната оска, електричниот мотор ја придвижува задната оска, која се активира доколку е потребно – за да се вклучи дополнителна моќност при стартување или да се подобри влечната сила на мазните површини и надвор од патот.
„Вижн X“ е првото возило со погон на сите тркала на „Шкода“ без карданско вратило. Ова има јасни придобивки: помалата тежина автоматски значи помала потрошувачка. Освен тоа, електричниот мотор стартува само кога е потребно. Два електрични мотора го поддржуваат CNG-погонот. Уредот со погон на четири тркала се состои од мотор со внатрешно согорување опремен со еден од двата електрични мотора – генератор за стартен погон (BSG) и вториот електричен мотор на задната оска, напојуван со 48-волтна литиум-јонска батерија. Благодарение на обновувањето, литиум-јонската батерија се полни за време на возењето. Во текот на сопирањето и движењето во неутрална брзина „вижн X“ ја претвора кинетичката енергија во електрична и подоцна ја користи оваа енергија за возење. Максималниот вртежен момент од 70 Nm е достапен од застој, значително интензивирајќи ја спонтаноста при стартување и агилноста при кратки забрзувања. Предностите на батериите за полнење вклучуваат мала тежина, поголем капацитет и прифатлива цена.
Концептот се движи со погон на предни, задни или четири тркала по потреба. Задниот погон носи 1.000 Nm до патот, а моделот има опсег до 650 километри благодарение на дополнителниот резервоар за гориво. Перформансите на системот на двете погонски единици овозможуваат „шкода вижн Х“ да забрза од 0 до 100 километри на час за 9,3 секунди, со максимална брзина од 200 километри на час.
Стратегија за електромобилност
Електромобилност игра клучна улога во глобалната стратегија за раст на „Шкода ауто“. Електрификацијата на моделите на „Шкода ауто“ ќе почне во 2019 година со воведувањето на „шкода суперб“ со plug-in хибриден погон. Во прилог на производството на електрични автомобили фабриката во Млада Болеслав исто така ќе произведува електрични компоненти за plug-in хибридни модели на неколку брендови на „Фолксваген груп“ од 2019 година па натаму. Првото комплетно електрично возило „шкода“ ќе следува набргу потоа. До 2025 година брендот ќе го прошири својот асортиман на хибридни и батериски погони на моделите во разни сегменти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.