Европа
Шведска, Данска и Германија за ефикасен надзор на границите за да се сочува Шенген
Шведска, Данска и Германија сакаат да го сочуваат шенгенскиот систем, а за тоа е неопходна ефикасна контрола на надворешните граници и побрза распределба на бегалците по земјите членки на Европската унија, изјавија во средата во Брисел функционери на овие земји.
Еврокомесарот за внатрешни работи Димитрис Аврамопулос го свика во средата кризниот состанок на кој учествуваа шведскиот министер за миграции Морган Јохансон, данскиот министер за интеграции Ингер Стојберг и државниот секретар во германското министерство за внатрешни работи Оле Шредер.
Состанокот беше свикан откако Данска воведе гранични контроли на границата со Германија, како одговор на одлуката на шведските власти да го контролираат влегувањето на бегалците преку мостот кој ги поврзува Данска и Шведска.
Аврамопулос рече дека средбата била „конструктивна“ и оти сите се согласуваат дека треба да се сочува шенгенскиот систем во кој нема контрола на границите. Меѓутоа, поради масовниот прилив на бегалци земјите членки на Шенгенскиот договор сé почесто воведуваат привремени контроли на своите граници, што го доведува во прашање целиот систем.
„Шенген и слободата на движењето на луѓето мора да бидат сочувани поради нашите граѓани и економии“,рече Аврамопулос, додавајќи дека привремени контроли коишто ги вовеле споменатите земји мора да бидат ограничени на онолку колку што тоа е неопходно и дека треба да се вратат на нормалниот режим што е поскоро можно.
Шведскиот министер за миграции Морган Јохансон, чија земја прими најмногу бегалци според бројот на жителите, изјави дека „Шведска може многу да стори, но не може сé“. Оттаму, повика ефикасно да се спроведува одлуката за редистрибуција на беглаците по земјите членки, за порамномерно да се распореди товарот.
Шведска само минатата 2015 година примила 160.000 баратели на азил, меѓу кои 26.000 малолетни деца. „Тоа претставува илјадници училишни одделенија“, појасни Јохансон.
Германскиот државен секретар Шредер повтори дека сите се согласни за неопходноста да се сочува Шенген, а дека за тоа е потребно да се осигури надзорот на надворешните граници на ЕУ. „Проблемот е во тоа што не функционира контролата на надворешните граници, особено на грчко-турската граница“, рече Шредер,додавајќи дека е потребно да се најде европско решение, бидејќи во спротивно земјите членки ќе преземаат национални мерки./крај/мф/сн
Извор: Hina
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанските студенти планираат протести против Израел
Студентите во Шпанија во наредните денови би можеле да почнат протести против „геноцидот што го изврши Израел во Палестина“ по примерот на универзитетите во САД, Холандија и Белгија, изјавија нивните претставници за шпанските медиуми.
На Филозофскиот факултет во Валенсија, приморски град на југозападот на земјата, студентите веќе една недела спијат во шатори и секојдневно протестираат.
„Бараме од нашиот универзитет да ги прекине сите врски со институциите и компаниите што соработуваат со Израел“, изјави 20-годишната Естер Монге, студентка по политички науки и социологија за весникот „Ел Паис“.
Во моментот многу универзитети одржуваат состаноци, на кои студентите и професорите гласаат за блокадите на факултетите.
„Студентскиот совет ќе одлучи за активностите во наредните денови“, рече Марија Хозе Лера, координаторка на „Палестиниум“, група за солидарност со палестинските аспирации.
Лера, која има докторат по психологија на Универзитетот во Севилја, вели дека моменно се одржуваат состаноци на универзитетите во Мадрид, Сарагоса, Барселона, Жирона, Гранада и во други градови.
Во понеделникот стотици студенти се собраа пред Универзитетот во Барселона, каде што ги развиорија своите транспаренти.
„Сакаме нашите факултети да ги прекинат сите односи со Израел и компаниите што работат таму“, рече 24-годишниот Пабло Кастиља, дипломиран студент по јавна политика.
Во Мадрид сѐ уште нема протестно кампување, но има демонстрации. На автономниот универзитет во Мадрид планираното предавање за НАТО беше откажано под притисок на пропалестинските демонстранти.
Друг јавен универзитет, Universidad Complutense de Madrid, објави декларација со наслов „Со Палестина против геноцидот во Газа“.
„По влошувањето на насилството врз палестинскиот народ, ги повикуваме професорите, истражувачите и вработените во администрацијата да се спротивстават на колективното казнување на Палестинците што го спроведува Израел“, се вели во декларацијата усвоена од администрацијата на Факултетот за политички науки и социологија.
Сведоци сме на геноцидот врз палестинскиот народ, што е продолжение на децениското систематско насилство врз палестинскиот народ и неговата присилна емиграција“, се вели во декларацијата објавена на веб-страницата на Факултетот.
Европа
(Видео) Украинците објавија снимка: „Ова се руски агенти, сакаа да го убијат Зеленски“
Украинските разузнавачи соопштија дека спречиле руски заговор за атентат на претседателот Володимир Зеленски. Украинската служба за државна безбедност СБУ објави дека фатила руски агенти, кои биле вработени во украинската државна гарда. Разузнавачките претставници велат дека руски агенти планирале да ги убијат претседателот и други високи владини функционери.
Шефот на СБУ, Васил Маљук, изјави дека неуспешниот атентат требало да биде подарок за Владимир Путин пред неговата денешна инаугурација.
СБУ на својот канал на „Телеграм“ објави тврдење дека руски таен агент ги пренел координатите на безбедната куќа пред планираниот воздушен напад. Претставници на разузнавањето додадоа дека Русија планирала да ги уништи сите траги од дронот што би се користел за гаѓање на претседателот со друг проектил.
„Непријателот активно развиваше планови за да го тргне претседателот Володимир Зеленски. Една од задачите на руската разузнавачка мрежа ФСБ беше да бара џелати меѓу војниците блиски до службата што го штити претседателот, кои би можеле да го убијат шефот на државата“, соопштија од СБУ.
„Покрај Володимир Зеленски, непријателот планира да ги елиминира и шефот на Службата за безбедност на Украина, Васил Маљук, шефот на Воената разузнавачка служба на Украина, Кирил Буданов, и други високи функционери“, се вели во соопштението.
„Ограничен број луѓе знаеја за нашата специјална операција и јас лично го следев нејзиниот напредок. Терористичкиот напад, кој требаше да биде подарок за Путин пред инаугурацијата, всушност беше неуспех на руските специјални служби“, рече Маљук.
„Но, не смееме да заборавиме – непријателот е силен и искусен, не може да се потцени. Ќе продолжиме да планираме однапред и да си ја работиме работата секој предавник да ги добие заслужените судски казни“, заклучи тој.
СБУ наведува дека при претресот на просториите на уапсените руски агенти биле пронајдени „релевантни средства за уништување“ и други докази за криминални активности.
Европа
Босфор затворен, заринка украински брод
Теснината Босфор, која го поврзува Црното со Средоземното Море, е затворена за бродови откога денеска таму заринка товарен брод од Украина, соопштија турските власти за ДПА.
Бродот „Алексис“ превезува прехранбени производи од Украина до Египет. Дефект на моторот се случил во близина на излезот од пловниот пат, изјави портпаролот на Управата за безбедност на крајбрежјето за дпа.
Спасувачките напори се веќе во тек, додаде изворот. Босфорот служи како излез за украинското жито на светските пазари во екот на руската инвазија. Речиси 40.000 брода поминале низ Босфорот во 2023 година, според турското Министерство за транспорт.