Припадниците на Државната агенција за истраги и заштита на Босна и Херцеговина (SIPA) во вторникот уапсиле уште едно лице кое е осомничено дека е поврзано со терористичкиот напад врз полициската станица во Зворник, а била пребаран и месџидот, просторија за муслиманска молитва во местото Дубница кај Калесија, во северозападна Босна.

Според соопштението на SIPА, уапсеното лице, според локалните медиуми извесен Касим Мехидиќ, над коешто се спроведува криминалистичка обработка, ќе биде предадено на обвинителството на БиХ кое ја води истрагата за нападот во кој 24-годишниот Нердин Ибриќ уби еден а рани уште двајца полицајци во Зворник.

Според весникот Dnevni avaz, напаѓачот бил сопственик на компанија чие седиште било во селото Мољановци крај Калесија. Членови на семејството и роднини потврдиле за медиумите дека тој од скоро започнал да посетува верски предавања во месџидот во Дубница, а тоа го поврзуваат со промени во неговото однесување, како и неговото поврзување со заедницата на радикалните исламисти – вехаби.

„Му зборував дека тоа ќе донесе смрт, и нему и мене. Тие се претставуваат како луѓе кои се на исправниот пат“, изјавила за телевизијата N1, Халима Ибриќ, мајката на напаѓачот.

Уште во понеделникот вечерта полицијата со нападот во Зворник го поврза и поради тоа го уапси Авдулах Хасанович, и претходно приведуван во рамките на полициската акција „Дамаск3 насочена против мрежата во БиХ која регрутира припадници за џихадистичката терористичка организација Исламска држава./крај/мф/сн

Извор: Макфакс