Јавниот обвинител Љубомир Јовевски, кој е десна рака на Зоран Заев, пред само неколку дена јавно на прес-конференција проба да ги амнестира сите инволвирани политичари во случајот „Рекет“, изјавувајќи дека немало инволвирани политичари, порача портпаролот на ВМРО-ДПМНЕ, Димче Арсовски.

„Само неколку дена потоа излезе документ од исказ за кој самото обвинителство на Јовевски и на Русковска потврди дека е автентичен и со самото тоа потврди дека според исказот на оштетениот вмешани се целиот политички врв на СДСМ, вклучително и Зоран Заев.

Истрагата се води штуро, без потребен интензитет и непрофесионално. Јавното обвинителство се занимава со сè само не со тоа што треба, а тоа е да ја сведе истрагата експедитивно до самиот крај и да се разреши целиот случај во корист на граѓаните. Сега во моментов им е поважно како излегол документот и дефокусираат, а не им е важно да ги повикаат сите оние инволвирани на распит да го дадат својот исказ за својата вмешаност.

Цели 4 месеци Русковска не повикува никого на распит. За разлика од тоа, во случајот со 27 само со еден исказ беа притворени луѓе. Начинот на кој Зоран Заев ја опструира професионалноста на истрагата и пробува да ја управува по свој терк е само уште една потврда за неговите страв, очај и инволвираност во целиот случај „Рекет“.

Зошто сè уште не е повикан Зоран Заев на распит? Зошто сè уште не се повикани на распит целата фамилија Ременски? Зошто сè уште не е притворен синот на Катица Јанева, за којшто видовме дека имало директна вмешаност во целиот случај? Зошто сè уште не е повикана на распит Радмила Шекеринска, да каже што разговарале кај Боки 13? Кои се други се вмешани во целиот случај на „Рекет“? Кога ќе бидат повикани на распит сите овие луѓе?

Дали Заев, Русковска и Јовевски сакаат да ја забошотат целата истрага, на тој начин со којшто ќе ја развлечат и всушност нема ништо да направат? Замешани се сите до еден и влезени се до гуша во криминал целата Влада и целото раководство на СДСМ. Одговорност мора да има за сите до еден. Веднаш штом се смени оваа Влада на СДСМ, сите до еден инволвирани во  каков било криминал ќе одговараат. И тоа го ветуваме јавно“, рече Арсовски.