Според одредени процени, хрватскиот државјанин Томислав Салопек, киднапиран од страна на терористичката организација Исламска држава (IS – ИД), по сé изгледа има уште неколку часови живот и се претпоставува дека рокот за исполнувањето на барањата на џихадистите истекнува во петок напладне, пишуваат медиуми.

Салопек беше киднапиран на 22-ри јули во Каиро и се појави во видео снимка од ИД, објавена пред помалку од 48 часа, а според наводите всушност толку време им е оставено на и египетските власти да ослободат муслимански затворенички од затвор или, пак, во спротивно тој ќе биде убиен.

Во обид да се издејствува негово ослободување, во Каиро допатува шефицата на хрватската дипломатија Весна Пусиќ, заедно со сопругата на Салопек, а според зборовите на неговото семејство, за случајот се заинтересирала и хрватската претседателка Колинда Грабар-Китаровиќ.

Според неименуван член од семејството на Салопек, француската компанија во која тој бил вработен прво тврдела дека Хрватот бил киднапиран од обична криминална банда, сочинета од деца на возраст од 15 до 18 години. Сепак, потоа се дознало дека зад киднапирањето ана 30-годишниот Хрват стои во моментов најопасната терористичка организација на светот, основно нејзиниот огранок на Синајскиот полуостров.

По објавувањето на снимката со Салопек се појавиле информации дека тој бил случајно киднапиран и дека џихадистите сакале да киднапираат Французин. Сепак, на семејството ѝ е сомнителен и возачот во компанија за која работел Салопек, а кој наводно бил присутен кога се случило киднапирањето и бил оставен од страна на џихадистите во пустина.

Таткото на Салопек, пак, упати порака до киднаперите неговиот син да го пуштат на слобода, и дека единствената причина поради којашто тој отишол во Египет е да заработи за леб за својата фамилија./крај/мф/бс

Извор: Макфакс