Европа
На примирјето во Украина му се заканува пропаст
Откако во неделата четворицата челници, на Украина, Русија, Франција и Германија, како и мисијата на ОБСЕ констатираа дека постигнатиот минатиот четврток договор за прекин на огнот во источна Украина во Минск главно се почитува, во понеделникот повторно започнаа меѓусебните обвинувања за прекршување на примирјето.
Прозападните власти во Киев соопштија дека проруските бунтовници ги напаѓаат нивните сили кои се во опкружување на рускојзичниот исток од земјата, и дека нема да го повлечат тешкото вооружување.
Рускиот претседател Владимир Путин уште во петокот предупреди дека ситуацијата околу важниот железнички јазол во Дебалцево, на патот меѓу двата одметнати бунтовнички центра Донец и Луганск, ќе биде голема закана за одржување на примирјето. Тој ги повика украинските сили, коишто се во опкружување речиси еден месец, и чија бројност се проценува меѓу шест и осум илјади вклучително се тешко вооружување, да го положат оружјето и да се повлечат кон внатрешноста на Украина. Во неделата силите на рускојазичните милиции објавија дека украинските единици од Дебалцево не неколку наврати се обиделе да го пробијат нивниот обрач.
Вашингтон објави дека во операциите околу Дебалцево, рускојазичните бунтовници имаат поддршка од регуларни руски вооружени сили, што Москва уште еднаш го демантираше и обвинувањата ги испрати во обратна насока, во смисла на поттикнување на Киев да најде оправдување на не го почитува договорот за прекин на огнот и особено за повлекување на тешкото вооружување, со какво што располагаат украинските единици во споменатиот град кој пред војната имаше 25 илјади жители, а кое според Минската споредба би требало да биде повлечено на 40 до 70 километри од линијата на конфликтот, во зависноста од калибарот на оружјето. Бунтовниците, исто така, соопштија дека нема да го повлечат своето тешко оружје, додека во него има украински војници.
Репортерот на Reuters јави дека во Дебалцево постојано се слушаат гранатирања од артилерија. Најмалку шест тенкови и оклопни транспортери и артилерија видел во шумата недалеку од Вуглериск, десетина километри западно од Дебалцево, место што пред десетина дена го заземаа бунтовниците. Во неговиот извештај се наведува дека можело да се видат воени камион на главниот пат кон градот додека се слушало гранатирање и оган од автоматско оружје.
„Можете да слушнете дека нема примирје. Дебалцево е наша територија и ние ќе ја заземеме“, рекол бунтовнички борец, стои во извештајот на дописникот на Reuters.
„Постои Мински договор, според кој Дебалцево е наше. Ние нема да си заминеме“, изјавил Селезнев во телефонски разговор за Reuters истакнувајќи дека Дебалцево се наоѓа на територија која е е под контрола на Киев.
Претходно во саботата Русија изрази сериозна загриженост поради обидите на Киев и Западот да го „искривуваат“ договорот за примирје во Украина, кој беше склучен во четвртокот во белоруската престолнина Минск по 16-часовните преговори меѓу челниците на Украина, Русија, Франција и Германија,.
„Сериозната загриженост предизвикува тоа што официјални претставници на украинската страна низ изјавите на министерот за надворешни работи П.А. Кломкин, како и уште некои западни земји, а особено САД, застанаа зад ставот на радикалните националисти во Врховната Рада (украинскиот парламент –з. Р.) и започнаа да ја искривуваат содржината на договорот од Минск, доведувајќи го во прашање спроведувањето на конкретните одредби од документот кој го одобрија челниците на Русија, Германија, Франција и Украина“, се наведува во соопштението објавено на интернет страницата на руското министерство за надворешни работи.
Претходно во понеделникот еден од челниците на самопрогласената ткн Народна република Донецк, Денис Пушилин за агенцијата ТАСС изјави дека бунтовниците се подготвени да отворат ткн „зелен коридор“ преку кој украинските војници ќе се извлечат од обрачот во Дебалцево.
Во меѓувреме агенцијата ја пренесе изјавата на портпаролот на Вооружените сили на Украина, Владислав Селезнев дека Киев го одбива предлогот на бунтовниците да ги повлече своите единици од Дебалцево преку ебзбеден коридор
Киев соопшти дека неговите сили биле гранатирани повеќе од сто пати откако во саботата на полноќ стапи на сила прекинот на огнот. Воениот портпарол на Киев, Андриј Лисенко изјави дека владините сили не можат да го повлечат тешкото вооружување, доколку не биде почитувано примирјето.
„Предуслов за повлекување на тешкото вооружување е исполнување на првата точка од договорот од Минск, а тоа е примирјето. Сто и дванаесет напади не се показател за примирјето. Во овој момент не сме подготвени да го повлечеме тешкото оружје“, изјави Лисенко на прес конференција во Киев, пренесува AFP.
Украинската армија наведе дека пет нејзини војници се убиени а 25 се ранети од стапувањето на сила на прекин на огнот, додека бунтовничките претставници од Луганск соопштија дека во гранатирање на село во близина на градот кое е под нивна контрола загинале двајца цивили.
Дека „мировните напори на европските челници и Москва“ се под загакана поради одбивањето на Киев да започне со повлекувањето на тешкото вооружување, потврди и бунтовничкиот челник од Донецк, Денис Пушилин.
„Уште еднаш напорите на шефовите на европските држави и на претседателот на Руската Федерација во планот на Минската мировна иницијатива се сериозно загрозени од пропаѓање. Треба да се обрати внимание дека портпаролот Лисенко изјави дека украинската страна не е подготвена да го повлече тешкото вооружување од линијата на контактот во Донбас“, изјави Пушилин, кого го цитира РИА Новости.
„Ние сме подготвени само на заемно повлекување на опремата, како што тоа е препишано со сетот мерки за исполнување на Минскиот договор“, додал./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.