Македонија
(Видео) Пендаровски на почетокот на проектот „Лице в лице со претседателот“ во посета на Велес
Претседателот Стево Пендаровски, во рамките на проектот „Лице в лице со претседателот“, денеска ја посети општина Велес. Toj заедно со градоначалникот Аце Коцевски засади садници на опожарените места крај езерото Младост. Станува збор за површина од 409 хектари зафатена со пожар кон крајот на август. Во моментот локацијата се расчистува и се подготвува за пошумување.
Идејата на овој вид посети, како што истакна претседателот Пендаровски, e да се види лице в лице со граѓаните, во нивните домови, работни места, во институциите, да поразговара за нивните проблеми, како и за можноста да им помогне.
„Јас знам дека за многу од нивните проблеми немам директна надлежност, меѓутоа, се разбира, можам да зборувам гласно, да ги предупредувам надлежните институции и да апелираме тоа да оди побргу. Бидејќи главната цел нам политичарите ни е да им го направиме животот полесен на граѓаните и мислам дека е добро што ние одиме кон нив и разговараме на дневна основа со граѓаните во државата, а не чекаме тие да ни напишат писмо“, истакна Претседателот.
Претседателот Пендаровски нагласи дека на овој начин им ја дава и својата поддршка на градоначалниците во извршувањето на нивните обврски.
„Се случува некојпат на градоначалниците гласот да не им стига до Скопје, до централната власт и ако има таква мискомуникација меѓу министерствата и некои од општинските власти, можам да помогнам“, рече претседателот Пендаровски, додавајќи дека тоа што тој како Претседател нема директна надлежност во решавањето на проблемите од локална природа, не го спречува да комуницира со општините и да настојува да помогне.
Претседателот Пендаровски го посети ООУ „Св. Кирил и Методиј“, едно од најстарите училишта во државата, основано во 1857 година, во кое учеле видни велешани, меѓу кои Рацин, Брашнаров, Прличко, Манасков. Во моментов е меѓу 10-те најдобри основни училишта во државата.
Во рамки на посетата на Велес, претседателот Пендаровски ја посети Територијалната противпожарна единица во Велес, каде одблиску се запозна со условите за работа. На средбата со командирот на единицата и пожарникарите беше констатирана потребата од инвестиција во човечки капитал и материјални средства. На средбата присуствуваше и пожарникарот, Нихат Бајрович, повреден при интервенција на пожар во Сопот во август.
„Генерално се согласувам дека состојбата со личната заштита и со опремата која ја користат овие единици не е на задоволително ниво, меѓутоа се прават напори во таа насока и јас се надевам и во Велес и во други места каде што тоа е неопходно ќе биде тоа видливо“, истакна претседателот Пендаровски, потенцирајќи ја важноста за овие проблеми да се зборува навремено, а не само кога се случуваат вакви немили настани.
За време на посетата на Велес, претседателот Пендаровски ја посети фабриката за прехранбени производи „Мирана“, каде се запозна со производствениот процес во фабриката. Пред сопствениците на компанијата, претседателот Пендаровски ги претстави своите заложби на економијата да и се даде приоритет.
Претседателот Пендаровски во Велес го посети семејството Богдановски, кои изработуваат виолини. Светозар Богданоски е сликар, самоук изработувач на виолини кој пред повеќе од три децении започнал да го изработува овој инструмент за потребите на неговиот син.
Во рамки на посетата на Велес, претседателот Пендаровски се сретна со претставници на граѓански организации, а ја посети и библиотеката „Гоце Делчев“, каде оствари средба со волонтерите од „Мировен Корпус“ кои помагаат на граѓани од Велес во изучување на англискиот јазик, како и со новинари од локалните медиуми.
Проектот „Лице в лице со Претседателот“ е инициран во изборната програма на претседателот Пендаровски. Целта е преку посети на населените места во Северна Македонија, претседателот Пендаровски да се сретне со што е можно повеќе граѓани, и одблиску да ги слушне проблемите и предизвиците со кои се соочуваат граѓаните, како и идеи за нивно надминување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тренчевска: Од 2017 година до денес најниската исплатена пензија ја покачивме за 5.309 денари
„330% повисока социјална помош, 53% повисоки пензии, 180% повисока минимална плата, 40 000 просечна плата се нашите резултати и знам дека тоа можеби не е доволно. Затоа вечерва стојам пред вас не како жена, туку како ваша пријателка и комшивка, како жена која работеше со интегритет и бара поддршка за број 1 на 8 мај“ порача Тренчевска од говорницата на митингот во Радовиш.
Ко-носителката на изборна единица 4 од СДСМ, Јованка Тренчевска вечерва на радовишани им порача дека вистинскиот избор е јасен и дека само СДСМ е опција која ќе го води напредокот на општеството.
„Вие највозрасните кои гледам ве има тука во голем број, а со кои деновиве често се среќавав и често ме прашувавте зошто не може покачување од 5000 денари за секој од вас, Ве потсетувам дека од 2017 година до денес најниската исплатена пензија ја покачивме за 5.309 денари, и овој месец најниската исплатена пензија изнесува 13 880 денари. Стабилната исплата на вашите пензии ќе биде доведена во прашање со лажните ветувања на ВМРО, кои слушам деновиве дека започнаа да го раситнуваат лажното покачување на пензиите на месеци, на години и на нови методологии. Знаат и тие дека на лагата и се кратки нозете! Знаат дека 5000 линеарно е невозможно. Но дека е добро за да манипулираат со највозрасните“ рече Тренчевска.
Таа истакна дека во новиот мандат СДСМ се обврзува минималната пензија да ја покачи на 20.000 денари додека просечната пензија ќе ја покачи на 30.000 денари.
„Да продолжиме да градиме мостови посилни од ѕидовите и омразата кои ни ги наметнува ДПМНЕ“ истакна Тренчевска во нејзината покана за граѓаните за да излезат на гласање на 8ми мај.
Македонија
Мицкоски од Тетово: Во рамките на проектот за 250 милиони евра за инфраструктурен развој на општините, дел ќе се инвестира и во општините во западна Македонија
„Живееме под едно небо, делиме исти проблеми, исти предизвици. Маката ни е иста, и копнееме по заеднички работи. Денес Македонија е држава каде управуваат стотина души кои ги запоседнале институциите и грубо ги злоупотребуваат. Секој тендер поминува низ нивни раце, за секој бизнис процентот на добивка го определуваат истите луѓе. Тој артаноиден систем стана синоним за корупција и неказнет криминал. Систем на искривени вредности и непринципиелност која државата ја носи во пропаст“, истакна претседателот на ВМРО-ДПМНЕ, Христијан Мицкоски од митингот во Тетово.
Мицкоски додаде дека доаѓа ново време, се врти нов лист, нов почеток.
„Овде од Тетово објавувам дека веднаш по победата и формирањето на влада значаен процент од буџетот ќе оди за развој и решавање на децениските инфраструктурни проекти на Тетово, Гостивар, Кичево, Струга, Дебар и повеќе други општини од западна Македонија“, вети Мицкоски.
„Се обврзувам дека во рамките на проектот за 250 милиони евра за инфраструктурен развој на општините дел ќе се инвестира и на овие места овде. Подеднакво ќе градиме и работиме за развој на штипско Ново село, но и за тетовско Теарце, за струмички Куклиш, но и за тетовско Одри“, порача претседателот на ВМРО-ДПМНЕ.
Тој рече дека на народот му е доста од удирање во гради, зборење за права, а во реалноста сето тоа да се сведе на крадење и тендери. Реално и со дела да се менува животот на луѓето и тоа идната Влада предводена од ВМРО-ДПМНЕ ќе го направи.
„За да се случи ова што ви го зборувам, на 8-ми мај мора да се заврши започнатата работа. Цунамито е кренато. Тоа цунами треба да удри на денот на изборите и да ја оддува забрефтаната од криминал власт. Решението против сите сценарија кои ги прават од СДСМ и ДУИ е излезноста“, порача Мицкоски.
Тој ги повика граѓаните на осми мај да излезат и да гласаат, време е да започнат промените во Македонија.
Македонија
Битиќи: Бидете патриоти, изберете европска иднина на соживот и плати од 1.300 евра
„На 8-ми мај излезете на гласачките места и со заокружување на бројот еден да ги сочуваме темелите на државата, на демократските вредности, на внатрешната кохезија на етникумите и верските заедници. Бидете патриоти и изберете безбедна и европска иднина, каде ќе бидеме сплотени и ќе имаме просечна плато до 1.300 евра“, порача на денешните средби со жителите на Бутел и Чучер Сандево, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Битиќи истакна дека длабоко верува дека мнозинството од граѓаните не сакаат враќање 20 години назад во минатото, во заробена држава и поделено општество, во држава во која минималната плата изнесуваше под 10.000 денари.
„Гледате политичари кои дефилираат по митинзите со националистички пароли и пораки за изолација на државата. Но, уверен сум дека со вашиот глас за бројот 1 ќе ги замолчите, ќе им покажете дека вашата одлука е да имаме нова влада која ќе продолжи државата да ја води кон Европската унија, кон нејзините вредности, “ рече Битиќи и посочи дека СДСМ и коалицијата имаат програма која ќе ја исполни оваа мнозинска желба на граѓаните на Македонија.
Нагласи дека агендата на националистите е празна, а програмите им се полни со празни зборови, затоа нудат само несигурност и страв меѓу граѓаните.
„Знаеме дека патот до ЕУ е тежок, со многу пречки пред нас, но ЕУ е единствениот начин да ги смениме работите на подобро, во економијата, во образованието, во здравството.
Не смееме да се откажеме од европското семејство и да ги замолчиме националистите“, порача Битиќи.
Зборувајќи за мерките од предизборната програма на СДСМ, Битиќи посочи дека членството во ЕУ не само што ќе однесе посилна кохезија помеѓу различните етнички и верски заедници во Македонија, туку тоа ќе значи и подобар и поквалитетен живот за сите граѓани
„Пред вас излегуваме со конкретни верувања, за кои во минатото покажавме дека ги исполнуваме, а ќе ги исполниме и сега. Гарантирам е просечна плата од 1.100 евра и минимална плата од 600 евра, кои со влезот во ЕУ проектираме да достигнат до 1.300 евра односно 800 евра“, им порача Битиќи на жителите на Бутел и Чучер Сандево.