Два вооружени грабежа на бензинска пумпа и киоск, како и две кражби во стан и куќа се случиле во Скопје во понеделник и вторник (23-ти и 24-ти јуни), соопшти Министерството за внатрешни работи.

Грабежот на бензинската пумпа „Арена Петрол“ на булеварот „Македонско косовска бригада“ во населба Бутел се случил вчера во 22,45 часот. Двајца маскирани разбојници од кои едниот вооружен со пиштол дошле на бензинската, им се заканиле на вработените и одзеле од нив околу 75.000 денари.

Неколку часа подоцна, поточно околу еден часот по полноќ се случил вооружен грабеж во киоскот „Есктра Кофи Тобако“ на улицата „Филип Втори“, во близина на Градскиот трговски цента во центарот на градот. Разбојникот и се заканил на вработената со пиштол и украл од касата околу пет илјади денари.

Покрај ова, во текот на вчерашниот ден биле ограбени и стан и куќа во Скопје, во населбата Бутел. Непознат сторител провалил во куќа на улицата „Македонско косовска бригада“ во Бутел, сопственост на А.С. (44), од каде што украл разен златен накит и мобилен телефон во вкупна вредност од околу 450.000 денари.

Втората кражба се случила во стан на улицата „Гоце Стојчевски“, сопственост на С.И. (39), од каде што крадецот зел околу 5.000 евра, 24.000 денари и разновиден златен накит со што причинил материјална штета од околу 400.000 денари.

Полицијата презема мерки за откривање на сторителите./крај/мф/сд