Европа
Борби во близина на украински Мариупол
Борбите не престануваат во близина на стратешкото пристаниште на Азовското Море – Мариупол на украинскиот рускојазичен југоисток, кое е под контрола на силите лојални на Киев, а во последните 24 часа таму се убиени тројца припадници на проруските милиции.
Селото Широкино, десетина километри источно од Мариупол, претрпело тешки разурнувања, најмногу околу патот кој ги раздвојува двете завојувани страни меѓусебно оддалечени околу 700 метри, известува репортерот на AFP. Борбите се водат секојдневно со артилериски и тенковски оган, рекол за агенцијата припадник на рускојазичните сили кој се претставил како Карас.
Набљудувачите од мисијата на Организацијата за безбедност и соработка во Европа (ОБСЕ) на теренот виделе во четвртокот „три украински тенкови како ги гаѓаат позициите на бунтовниците во Широкино“, на што другата страна возвратила со тенковски гранати кои паднале во близина на украинските позиции, се наведува во извештајот објавен во петокот навечер.
Бунтовниците тврдат дека контролираат околу 30 отсто од селото, главното упориште на киевските сили пред Мариупол, пристаниште коешто како што стравуваат во Киев може да стане цел на голема офанзива на бунтовниците. Имено, со заземањето на овој град со половина милиони жители, од кои големо мнозинство се етнички Руси и русофони но од почетокот на ланската априлска офанзива на киевските сили е под контрола на Националната гарда и доброволечките баталјони на прозападните власти, рускојазичните бунтовници би воспоставиле копнена врска меѓу териториите коишто ги контролираат во областа Донбас на истокот од Украина и црноморскиот полуостров Крим кој точно пред една година со референдум си ја врати автономијата и се присоедини кон Русија.
Тројца проруски борци загинале а шестмина се ранети во Широкино во последните 24 часа, објавија на своите официјални интернет мрежи властите на самопрогласената ткн Народна република Донецк. Се известува дека во истиот период до петокот вечерта украинската војска извела 33 напади врз Широкино и врз аеродромот крај Донецк кој во јануари го освоија проруските сили.
Во редовите на украинските сили нема загинати војници, но тројца се ранети, изјави портпаролот на украинската армија Андриј Лисенко, пренесуваат украинските медиуми. Тој додаде дека позициите на украинската војска се гранатирани од повеќекратните ракетни фрлачи „Град“, „првпат по речиси еден месец“.
Еден цивил го загубил животот во бомбардирањето на гратчето Авдовка, под контрола на киевските сили, во близина на разурнатиот аеродром крај Донецк, според тамошниот началник на полицијата Вјачеслав Аброскин.
Двете страни, иако признаваат дека примирјето на најголемиот дел од фронтот генерално се почитува, меѓусебно се обвинуваат за спорадични прекршувања на мировниот договор постигнат на 12-ти февруари во белоруската престолнина Минск, со посредство на челниците на Украина и Русија, претседателите Петро Порошенко и Владимир Путин, на иницијатива на францускиот претседател Франсоа Оланд и германската канцеларка Ангела Меркел.
Според овој договор, завојуваните страни се договорија по настапувањето на прекинот на огнот и размената на заробениците по принципот „сите за сите“ да се создаде тампон зона со повлекување на тешкото вооружување од линијата на раздвојувањето во длабочина од 50 до 140 километри во зависност од калибарот.
Европската унија во четвртокот договори задржување на сила на економските санкции против Русија наметнати поради нејзината наводна улога во украинската криза, „поврзувајќи ги со целосното спроведување на договорот од Минск“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Полските земјоделци повеќе нема да ја блокираат границата со Украина
Полските фармери го откажаа протестот на последниот блокиран граничен премин со Украина, објавија Киев и Варшава, ставајќи крај на повеќемесечната криза која ги наруши билатералните односи меѓу двете земји.
Украинскиот министер за земјоделство ја поздрави „конструктивната работа“ на Полска за укинување на блокадата, наведувајќи во соопштението дека преговорите со Варшава и индустриските здруженија не биле лесни, но „главната работа е што резултатот е постигнат“.
„За среќа, сите правци на границата со Полска се деблокирани“, изјави портпаролот на украинската гранична полиција Андриј Демченко, додавајќи дека полските фармери го ослободиле пристапот до преминот Рава-Руска.
Камиони утринава почнаа да ја минуваат границата во двата правци, рече тој.
Портпаролот на полската гранична полиција Анджеј Јузвијак изјави за Ројтерс дека Украина може да се премине „непречено“ на сите премини.
Полските земјоделци и камионџии ги блокираа граничните премини со Украина од крајот на есента минатата година во знак на протест против нелојалната конкуренција.
Како главна причина тие ја наведоа пасивноста на владата кон губење на работни места поради странските конкуренти од почетокот на војната во Украина, бидејќи камионџиите од Украина беа ослободени од обврската да имаат дозвола за преминување на полската граница.
Европа
Шпанскиот премиер останува на функцијата, нема да поднесе оставка
Шпанскиот премиер Педро Санчез денеска одлучи да остане на функцијата што ја извршува од летото 2018 година, иако претходно овој месец судија во Мадрид отвори истрага против неговата сопруга за можна корупција.
„Решив да продолжам, со уште посилна сила на чело на владата“, рече Санчез во говорот од владината зграда.
Санчез, лидер на шпанската социјалистичка работничка партија (ПСОЕ), во средата ги суспендираше сите должности за да „размисли“ пет дена дали вреди да остане на функцијата поради „лажни обвинувања“ и „напади врз неговата сопруга“.
Европа
Путин ги откажа парадите на 9 мај: „Стравот од украински напад е посилен од традицијата“
Рускиот претседател Владимир Путин беше принуден да ја откаже годишната руска триумфална парада на Денот на победата на 9 мај поради страв од напади со беспилотни летала со украински камикази, пишува „Сан“, додека руските медиуми јавуваат дека маршот на Бесмртниот полк и другите настани планирани за тој ден се намалени на многу поскромно ниво „од безбедносни причини“.
Путин наводно ги откажал повеќето од прославите на 9 мај – најсветиот ден во рускиот календар – затоа што не можел да ја гарантира безбедноста на своите граѓани.
Патриотски воени паради се одржуваат низ Русија како начин на славење на победата над нацистичка Германија во Втората светска војна.
Вообичаено, овие настани се користат за Путин да ја покаже моќта на руската воена машина и да генерира национална гордост – водејќи огромна парада на Црвениот плоштад во Москва.
Овој дел ќе се одржи под зголемено обезбедување – под надзор на Путин – но многу од воените паради во регионот се откажани заедно со придружниот огномет.
Областите на Белгород, Брјанск, Псков, Рјазан, Курск и Саратов ги откажаа своите настани, иако не се сите блиску до Украина.
Денот на победата беше откажан и во окупираните региони на Украина, вклучувајќи ги Запорожје и Севастопол на Крим, исто така поради „безбедносни причини“.
Пред руската инвазија на Украина, денот вклучуваше тенкови, нуклеарни проектили и друго масивно оружје што минуваше низ главниот град додека авионите летаа на небото.
Низ Русија, стотици маршеви на Бесмртниот полк – каде луѓето носат фотографии од нивните воени ветерани – исто така се откажани поради безбедносни причини.
Еден од стравувањата е дека овие настани би можеле да бидат преземени од антивоени демонстранти.
Огнометот беше откажан во некои други региони, како што е Сиктивкар, а откажани се концерти во Воронеж.
Во Ростов и Воронеж некои паради се откажани, додека други може да се одржат без публика.
Се очекуваат повеќе откажувања.
Минатата година, Денот на победата беше откажан ширум Русија со намален настан во Москва, каде речиси и да немаше изложена тешка воена опрема.
По две години војна во Украина, кружеа гласини дека парадите се откажани поради недостиг на тенкови за учество на парадите.
Дури и тогаш, локалните гувернери наведоа „безбедносни причини“.