Црна хроника
Тодоров и Јанакиески ги посетија повредените патници
За малку е избегната вистинска катастрофа, вака очевидци на тешката сообраќајна несреќа што утрото во вторникот се случи на железнички премин во Овчеполието, на патниот правец Штип – Велес, го опишуваат моментот кога шинобус удрил во автобус полн со патници при што 32 лица беа повредени од кои според информациите од надлежните органи четири од нив се во потешка состојба.
Местото на несреќата го посетија министерот за транспорт и врски, Миле Јанакиески, како и министерот за здравство, Никола Тодоров, по што ги посетија и повредените од тешката сообраќајна несреќа.
На Клиничката болница во Штип се пренесени 16 патници кои во моментов се во стабилна состојба. Еден од патниците, поради посериозна повреда на ‘рбетот, испратен е на клиниките во Скопје.
Во болницата во Велес биле пренесени уште 16 патници од кои тројца со потешки телесни повреди се испратени во Скопје.
Двајца од повредените се пуштени на домашно лекување.
Според информациите од Министерството за внатрешни работи, сообраќајната несреќа се случила околу 7 часот и 15 минути. Возот кој сообраќал на релацијата Кочани – Скопје на обезбеден железнички премин во близина на селото Сарамзалино налетал на автобус на автотранспортното претпријатие „Струмица експрес” кој бил полн со патници, при што поради јачината на ударот автобусот се превртил.
Според првичните информации, возачот на автобусот најверојатно се обидел да ја помине пругата, иако била спуштена рампата која сигнализирала проаѓање на возот.
По извршениот увид на несреќата сообраќајот на патниот правец Штип-Велес е нормализиран./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Полицијата во патничко возило со скопски регистарски ознаки пронашла 11 мигранти
На влезот во гевгелиското село Богородица, полициски службеници од Полициската станица за граничен надзор и гранични проверки Богородица во патничко возило „ауди“ со скопски регистарски ознаки вчера пронашле 11 лица мигранти.
МВР денеска осопшти дека вчера во 03.50 часот полицијата во патничко возило „ауди“ со скопски регистарски ознаки пронашла 11 лица мигранти, од кои пет лица од Сирија и шест лица од Република Турција.
– Откако ги забележал полициските службеници, возачот на возилото го напуштил местото. Мигрантите биле сместени во прифатно – транзитен центар во Гевгелија. Се преземаат мерки за расчистување на случајот, се појаснува во соопштението од МВР.
Црна хроника
ДУИ го осуди нападот врз претседателот на ФФМ
ДУИ го осуди вчерашниот напад врз претседателот на Фудбалската федерација Муамед Сејдини и изрази загриженост дека ова треба да биде силен аларм дека меѓуетничките тензии во земјата се зголемени.
„Овој инцидент се случува во време кога Владата се однесува како „бик во продавница за порцелан“, игнорирајќи ја и маргинализирајќи ја улогата на Албанците во јавниот и институционалниот живот и потценувајќи ја важноста на меѓуетничките односи. Ваквите постапки, кои доаѓаат во недела со серија други инциденти со етничка заднина, само дополнително ја влошуваат ситуацијата и создаваат опасна атмосфера за меѓуетничкиот соживот“, пишува во соопштението на Демократската унија за интеграција.
ДУИ тврди дека претседателот на ФФМ бил нападнат само поради неговата етничка припадност.
„Овој напад се случува и во контекст на голем неуспех во процесот на европска интеграција, што предизвика длабоко разочарување и ги затемни перспективите и надежите на нашите граѓани. Навредливите изјави на министерката за образование, која ги навреди вработените Албанци, нарекувајќи ги „неписмен народ”, дополнително ги зголемуваат тензиите и поделбите во општеството“, се вели во соопштението на партијата.
ДУИ ги повикува органите да реагираат брзо и професионално за да го расчистат овој случај, а Владата сериозно да размисли за важноста на зачувувањето на меѓуетничките односи и да ги почитува принципите на правично и еднакво застапување на сите граѓани.
Црна хроника
Тешко повреден 72-годишен возач на електричен тротинет
Вчера околу 19.25 часот во СВР Куманово било пријавено дека на ул.„Доне Божинов“ се случила сообраќајна несреќа помеѓу мопед „пежо“, управуван од Д.М.(18) и електричен тротинет управуван од Џ.И.(72), двајцата од Куманово.
„Во несреќата со тешки телесни повреди се здобил возачот на тротинетот, констатирани во Општата болница во Куманово“, информираат од МВР.
Извршен бил увид од увидна екипа на СВР Куманово.