Европскиот комесар за проширување и соседска политика Јоханес Хан им порача во петокот на властите во Приштина дека продолжувањето на дијалогот со Србија е законска обврска на Косово, како и дека во претстојниот извештај за напредокот ќе истакне дека Косово постигнало напредок, но и оти и натаму се соочува се сериозни предизвици.

Еврокомесарот Јоханес Хан изразил надеж дека до крајот на 2015 година ќе се создадат условите за препорака за визната либерализација за државјаните на Косово, пренесуваат регионалните медиуми.

Хан ги повикал сите политички фактори на Косово на почитување на институцијата за да се овозможи нивното функционирање, откако претходните денови беше оневозможувано работењето на косовскиот парламент со инцидентите и протестите на опозицијата, а седниците беа прекинувани со фрлање на солзавец. „Блокадата на собранието може да има влијание и врз односите со ЕУ, откако во прашања се некои закони кои треба да бидат усвоени во собранието“, порачал Хан.

Косовската опозиција се спротиставува на договорот за нормализација на односите со Србија, од коишто произлегува и обврската за формирање на Заедница на српските општини во оваа поранешна српска јужна покраина од која властите се повлекоа по воената интервенција на НАТО во 1999 година а албанските власти во Приштина со поддршка на САД и водечките земји на ЕУ еднострано прогласи независност во 2008 година којашто Белград не ја признава.

Хан во петокот во Приштина се сретна со косовските челници, претседателката Атифете Јахјага, со премиерот Иса Мустафа и со претседателот на Собранието Кадри Вејсели, а пратениците од опозициското движење Самоопределување во текот на специалната седница на којашто зборување еврокомесарот во косовскиот парламент истакнале транспарент со натписот „Нелегалниот договор не смее да мине“.

На заедничката прес-конференција со косовскиот премиер, Хан изразил надеж дека Европскиот парламент набрзо ќе даде согласност за неодамна потпишаната Спогодба за стабилизација и придружување, за што таа што поскоро да стапи на сила.

„Врз основа на Спогодбата, продолжувањето на дијалогот со Србија е законска обврска на Косово, и тоа е претстојниот фокус на патот кон ЕУ. Убеден сум дека премиерот и неговата влада имаат политичка волја да продолжат натаму“, порачал Хан во Приштина/

Косовскиот премиер Иса Мустафа, според приштинските медиуми, го замолил еврокомесарот за поддршка од страна на државите членки за членството на Косово во УНЕСКО, ветувајќи дела Косово ќе ги исполни сите препораки кои се однесуваат на културното наследство на Косово, при што се алудира на српските манастири и цркви./крај/мф/мн

Извор: Макфакс