Црна хроника
Минчо Јорданов, Трифун и Коста Костовски сведочеа во „Шпион“
Бизнисмените Минчо Јорданов, Трифун Костовски и неговиот син Коста во петок (14-ти март) сведочеа на судењето за случајот „Шпион“, во кој 19 лица се осомничени за шпионажа, уцена, измама, послужување во службата, недозволено изработување, држење и тргување со оружје, изнуда, злоупотреба на државна службена или воена тајна, оддавање државна тајна и злосторничко здружување.
Пред судот, прв даде исказ Минчо Јорданов кој зборуваше за неговите врски со еден од осомничените – Мичо Насковски, кој беше на чело на бордот директори на градежната компанија „Бетон” и кој, како што сведочеше Јорданов, му упатувал уцени, закани и побарувања од милионски суми откако бил отстранет од оваа функција. Заканувачките пораки биле објавувани на интернет порталот на новинарот Зоран Божиновски „Буревесник”.
На прашањето на судијата зошто прекинала соработката меѓу него и Насковски, Јорданов појасни дека во 2007 година го поставил Насковски за претседател на бордот директори на „Бетон” затоа што сметал дека е компетентен за таа положба и за остварување добри резултати на компанијата. По извесен период било утврдено недомаќинско работење од страна на Насковски и неговите соработници, и тие биле отстранети од компанијата.
По овој настан, рече пред судот Јорданов, почнал да добива пораки, закани и уцени со барање да му се исплатат пари кои наводно му ги должел на Насковски, иако, како што сведочеше Јорданов, тој за својата работа бил соодветно исплатен.
Заканите и уцените биле објавувани на порталот на новинарот Зоран Божиновски „Буревесник”, еден од осмничените во „Шпион”. Јорданов тврди дека зад сите закани стои Насковски.
Во октомври 2009 година во просториите на компанијата „Макстил” се одржал состанок на кој присуствувале Јорданов, Насковски, Зоран Витанов и Марјан Маџовски, шефот на кабинет на претседателот на Собранието,Трајко Вељаноски кои го убедувале дека барањата на Насковски се основани и дека му должи пари. Насковски во таа прилика барал милионски суми, а Јорданов тврди дека немал никакви обврски кон него по заминувањето од „Бетон”. Како што сведочеше Јорданов, Маџовски на состанокот бил единствен кој рекол дека, сепак, не постои писмена потврда дека Јорданов му должи нешто на Насковски.
На прашањето на Насковски упатено до Јорданов дали на состанокот во 2009 година тој побарал да се поднесе кривична пријава против Божиновски, Јорданов одговори потврдно.
Поранешниот градоначалник на Скопје, Трифун Костовски, во неговото сведочење рече дека на Горан Стојков му дал финансиска помош за основање фирма, а со Мичо Насковски дека се дружел приватно. На прашање на судијата дали некогаш новинарот Божиновски барал пари од него, одговори негативно и рече дека од него добивал само уцени дека ќе објавува текстови за скандали во ракометот.
И синот на Костовски, Коста, сведочеше дека Божиновски не барал пари од него, туку барал средба и му се заканувал дека ако не се одржи ќе објави докази за местење спортски натпревари.
Судскиот процес за „Шпион” почна на 27-ми јануари, а осомничените беа уапсени во септември 2013 година. Божиновски беше уапсен два месеци подоцна во Нови Сад. /крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.