Црна хроника
САД обвинија осум лица кои за неколку часа украдоа 45 милиони долари со кредитни картички
Американските власти обвинија осум лица за користење податоци добиени со хакирање систем за обработка на трансакциите на платежните картички во меѓународна криминална операција којашто само за неколку часа им донела 45 милион американски долари.
Обвинетите формирале глобална сајбер криминална организација чиј центар бил во Њујорк која украла податоци за дебитни картички од MasterCard од две арапски земји, соопшти американско министерство за правда.
Тие податоци ги употребиле за 40.500 трансакции од банкомати во 27 земји. Картичките ги издале National Bank of Ras Al-Khaimah PSC во Обединетите Арапски Емирати и Bank of Muscat во Оман, соопштија од обвинителството на САД.
Обвинителката Линч изјави дека нејзината канцеларија соработувала со органите на прогонот во 16 земји, вклучувајќи ги Јапонија, Канада, Германија и Романија, како дел од истрагата.
Властите соопштија дека уапсиле седум од осум обвинети и дека сите се државјани на САД, додека осмиот, според обвинителството, бил убиен на 27-ми април во Домениканската Република. Обвинителката Лорета Линч која ги покренала обвиненијата на прес-конференција изјави дека се` уште не е јасно дали неговото убиство е поврзано со овој случај.
Според изјавата од канцеларијата Линч, еден од осумте обвинети е идентификуван како Алберто Јуси Лаџуд-Пења, опишан во обвинението како лидер на групата, кој бил убиен во Доминиканската Република на 27-ми април. Другите седум лица биле уапсени во текот на шест седмици почнувајќи до 27-ми март и завршувајќи во вторникот.
Обвинителите соопштија и дека криминалните напади врз банкарските системи се случиле во два наврата, и тоа во декември 2012 година и во февруари 2013 година.
Хакерите си обезбедиле пристап до податоците на компаниите коишто ги обработуваат картичните трансакции, ги отстраниле ограничувањата за исплати и потоа организирале групи за извлекување на парите од банкоматите по светот со помош на украдените податоци, според обвинението.
Потоа „наплатувачите” ја „испрале” заработката, често купувајќи луксузни стоки, и дел им вратиле на водачите на организацијата.
Тие депонирале дел од кешот на банкарски сметки, во еден случај ставиле речиси 150 илјади долари во банкноти од по 20 долари на една сметка. Исто така, купувале скапи автомобили, часовници и други луксузни предмети.
Федералните американски власти соопштија дека заплениле банкарски сметки, стотици илјади долари во кеш, два извонредно скапи Rolex часовници и џип „мерцедес”, а треба да биде запленет и автомобил „порше”.
Во областа на Њујорк Сити, организацијата подигнала речиси 400 илјади долари за помалку од три часа, на 750 одделни банкомати на повеќе од 140 различни локации во Њујорк. Во друг случај во текот на десет часа на три илјади банкомати во поединечни трансакции собрале околу 2,4 милиони долaри.
Линч дополни дека е можно централата на глобалната операција да била надвор од САД, меѓутоа дека сегашните обвиненија се концентрирани само на њујоршката ќелија.
Обвинителката Линч ја опиша групата како „виртуелен криминален флеш, кој одел од банкомат до банкомат влечејќи големи суми пред овие сметки да бидат затворени”.
Од компанијата MasterCard во соопштението изјавија дека соработувале во истрагата и истакнаа дена нивните системи не биле зафатени или нарушени во кибернетичките напади.
Со овие суми, овој случај станува вториот најголем грабеж на банка во историјата на Њујорк, соопшти обвинителката Линч, по ткн „грабежот на Луфтханза” кога ограбувачите украле милиони во пари и во накит од меѓународниот аеродром „Џон Ф. Кенеди” во 1978 година според што беше снимен филмот „Goodfellas”.
Вкупниот грабеж на 45 милиони американски долари исто така не е и најголемиот банкарски грабеж, бидејќи во јули 2007 година беше објавено дека обезбедувањето од приватна банка во ирачката престолнина Багдад изнело најмалку 282 милиони американски долари коишто ги чувале во нејзините сефови.
„Обвинетите и нивните соучесници учествуваа во најголемиот грабеж на банка во XXI век што го рашириле на интернет и се протегал низ целиот свет. Наместо оружје и маски, оваа компјутерска криминална организација користела лаптоп компјутери и интернет”, рече Линч.
Обвинителите велат дека апсењата и кривичните пријави претставуваат победа на правосудните органи, меѓутоа „од друга страна иако ги идентификувавме некои од сторителите, се` уште нема пристап до повеќе од 40 милиони долари и никогаш нема се дојде до поголемиот дел од средствата”.
Компјутерскиот криминал стана проблем кој предизвика растечка загриженост во САД, особено бидејќи бројот на нападите со хакирање од странство постојано се зголемува. Дури и американската централна банка Federal Reserve (Fed) беше нападната од странство претходно во 2013 година.
Додека стануваат зачестени хакерските напади во кои се крадат лични податоци кои потоа може да се користат во шеми за кражба на идентитети, хакирањето за ограбување на банките и на компаниите за кредитни картички од страна на организираниот криминал, исто така, е се` поголем проблем. Во 2011 година, од банката Citigroup признаа дека повеќе од 2,7 милиони долари се украдени од 3.400 сметки за време на еден хакерски напад./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.
Црна хроника
Приведен скопјанец: се заканувал со ловечка пушка
Утрово во 01.20 часот во село Богомила, општина Чашка, полициски службеници од Полициското одделение Чашка го лишиле од слобода Ѓ.Ѓ.(36) од Скопје, постапувајќи по претходна пријава од Н.Д.(37) од село Богомила.
Ѓ.Ѓ. пред објект во селото со ловечка пушка му се заканил нему и на С.С., М.Д., Б.Ј., Т.Д., П.Б. и Д.Ѓ..
Бил задржан во полициска станица, а известен бил и јавен обвинител и по документирање на настанот протв него ќе биде поднесена соодветна пријава, соопшти полицијата.
Црна хроника
Кривична за директорот на ЈП „Пазари“ Битола: склучил договор за јавна набавка со фирма избришана од Централниот регистар
Одделот за криминалистичка полиција, по наредба од Основното јавно обвинителство Битола презема предистражни дејствија и во координација со СВР Битола поднесе кривична пријава против Б.К. од Скопје поради постоење основи на сомнение за сторено кривично дело „злоупотреба на постапката за јавен повик, доделување на договор за јавнa набавкa или јавно-приватно партнерство“ по член 275-в од Кривичниот законик и против В.А. од Битола поради постоење основи на сомнение за сторено кривично дело „несовесно работење во службата“ по член 353-в од Кривичниот законик. Имено, првопријавениот Б.К., во својство на управител на правно лице од Битола, на 19.12.2019 со неизвршување на обврските од склучен договор за јавна набавка на стоки за проектирање, набавка и монтажа на фотоволтаични панели за производство на електрична енергија со ЈП „Пазари“ Битола нанел штета на претпријатието. Тој дал гаранција за поставените фотоволтаични панели во рок од 25 години, иако знаел и бил свесен дека во предвидениот рок од една година од основањето на друштвото не го внел основачкиот влог на своето друштво согласно чл.186 ст.5 од Законот за трговски друштва поради што истото согласно чл.552-а и чл.552-б од истиот закон било избришано од Централниот регистар. Исто така, Б.К. знаел дека не можел да гарантира за изведените работи, со што постапил спротивно на дадената изјава за сериозност на понудата.
Второпријавениот В.А., во својство на директор на ЈП „Пазари“ Битола со пропуштање на должен надзор во вршењето на своите овластувања и должности, не извршил надзор кој бил должен да го изврши над носителот на набавката дали е активен субјект или не, со што не постапил согласно одредбите од склучениот договор за јавна набавка и не го раскинал. Исто така, В.А. постапил спротивно на чл.101 ст.7 од Законот за јавни набавки и не објавил негативна референца на електронскиот систем на јавни набавки на Бирото за јавни набавки. На тој начин В.А. му овозможил на првопријавениот да се стекне со противправна имотна корист како право да не биде исклучен од идните постапки за јавни набавки во период од шест месеци од денот на евентуалното објавување на негативната референца, а воедно и по доставена фактура одобрил и извршил плаќање кон првопријавениот односно кон неговото правно лице во вкупен износ од 1 298 000 денари со што го оштетил буџетот на ЈП „Пазари“ Битола.