Македонски државјани кои сакале да заминат за Германија и Холандија и да бараат азил во вторникот биле откриени на граничниот премин Табановце, соопштуваат од МВР.

Десетмина лажни азиланти ја минувале државната граница пешки и се претставиле како фудбалска екипа. Дел од нив имале намера да заминат во Германија, а дел во Холандија со цел да бараат економски азил.

Лице од Дизелдорф, Германија им земало по 250 евра и им ветувал азил во западноевропските земји. Во измамата му помогнал и битолчанец.

Измамникот пред три дена од Битола во Куманово превезол дел од азилантите со Мерцедес спринтер и ги сместил да преноќат во негова куќа во Куманово. Се договориле другиот ден да ги превезе до државната граница, да ја минат пеш, а тој со автомобил и нивниот багаж подоцна да ги преземе од српска страна.

Битолчанецот му организирал превоз на негов сограѓанин за во Холандија. Но дојденецот од Германија бил фатен на излез од Македонија додека битолчанецот со уште шест лица, лажни баратели на азил, биле најдени во куќата во Куманово. Против нив е поднесена кривична пријава за „злоупотреба на безвизниот режим со државите членки на Европската Унија и на Шенгенскиот договор“./крај/мвр/фф