Црна хроника
Љубе Бошкоски не даде одбрана зашто се плашел од обезбедувањето на обвинителката
Поранешниот министер за внатрешни работи и лидер на партијата Обединети за Македонија, Љубе Бошкоски не даде одбрана пред судот за случајот „Ровер“, односно за помагањето во убиството на Марјан Тушевски и Киро Јанев во 2001 година.
Атмосферата во судницата беше тензична и исполнета со расправии меѓу Бошкоски и обвинителката.
Тој објасни дека не можел да даде одбрана бидејќи не го разбирал обвинението, кое го нарече конфузно и фатаморгана, бидејќи не успеал да се консултира со својот адвокат Константин Кратовалиев, не примил дневна терапија и затоа што не се чувствувал безбедно во судницата.
„Обвинителката на Хашкиот трибунал Карла дел Понте нема толку обезбедување колку што гледаме околу обвинителката. Не знам од кого се брани обвинителката, освен судската полиција не треба да има други вооружени лица во судницава. Ако јас ја изнервирам обвинителката може да пукаат, се плашам за мојот живот. Вооружените лица ми сметат и ме возбудуваат“ рече Љубе Бошкоски.
Обвинителката, која ја обезбедуваат две лица, побара од судот да утврди дали стравот на Бошкоски е постојан или моментален и му рече на Бошкоски, дека освен двајцата нејзини обезбедувачи, вооружена била и таа, но со документи.
Во судницата започнаа расправии и меѓусебни обвинувања и Бошкоски побара од судот да утврди дали обвинителката носи пиштол во нејзината чанта.
„Не можам да дадам изјава додека има вооружена обвинителка“ рече Бошкоски.Процесот што се води против него го нарече „полициско-обвинителски монтиран“ и смета дека тој е донесен тука за отстрел, односно да се уништи до крај.
На судот му порача дека го почитува и рече дека во иднина овој ист суд треба да суди за други лица „со божја волја“.
Целиот фокус во овој процес бил ставен на него, а другите обвинети биле само колатерална штета.
Првите четворица обвинети во овој процес, Предраг Чубрило, Милан Илиќ, Милорад Ковачевиќ и Вук Вукичевиќ се во бегство и се недостапни за органите на прогонот. Првите тројца се обвинети дека се извршители на убиството, додека Вукичевиќ е наведен како организатор.
Бошкоски се товари дека како министер за внатрешни работи во тоа време му дозволил на сега веќе починатиот Орце Коруновски да нарача убиство заТушевски.
Бошкоски, како што пишува во обвинението, бил во добри односи со Коруновски, а тој пак, имал недоразбирања со Тушевски во врска со стриптиз барови и дискотеки.
Поранешниот министер за внатрешни работи се товари дека заедно со свои блиски луѓе, меѓу кои и шефот на обезбедувањето Зоран Трајковски, помогнале да не се откријат сторителите на двојното убиство.
Обвинетиот Сашо Јовановски Тупан кој, според обвинението им кажувал на извршителите каде се наоѓа Тушевски и каде да се движат, рече дека со Орце Коруновски се познавал преку негов школски другар и дека критичната вечер иако бил тазе женет бил со друга девојка во кафулето Панта Реи во Капиштец.
Тој негираше било каква вмешаност во случајот. Шестообвинетиот Ивица Ристиќ, кој се товари дека ги изнел од Македонија извршителите на убиството преку нелегален граничен премин, се бранеше со молчење.
Марјан Тушевски и Кире Јанев беа убиени на 10-ти јули 2001 година. кога излегувале од кафулето „ЗУ“ во скопската населба Капиштец. Прво со 11 куршуми беше убиен Тушевски, а потоа напаѓачите пукале и кон Киро Јанев кој се обидувал да избега. За овој случај одговараат 15 лица, а четворица од нив се во бегство./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Уапсен дилер од Штип, пронајдена дрога и голема сума пари
МВР информира дека вчера по преземени оперативни мерки и дејствија, полициски службеници од Отсекот за недозволена трговија со дрога и оружје го уапсиле 32 годишниот Б.М. од Штип.
При претрес во неговиот дом во Штип извршен по насоки од надлежен обвинител, биле пронајдени и одземени прашкаста материја, поголема сума на пари и дигитална вага.
„Лицето е задржано во полициска станица и во текот на денот со кривичната пријава ќе биде предаден на судија на претходна постапка за понатамошно постапување“, соопштија од полицијата.
Црна хроника
Стружанец објавувал експлицитна содржина од малолетничка
Полицијата во Тетово поднесе кривична пријава против А.А.(41) од Струга, поради постоење основи на сомнение за сторени кривични дела „злоупотреба на лични податоци“ и „производство и дистрибуција на детска порнографија“.
Пријавениот, на социјална мрежа, објавил фотографии и видео снимки со експлицитна содржина од женско лице, кое во тоа време било малолетно.
Црна хроника
Жена од Гевгелија измамила Грк дека е од Царина и му зела 2.000 евра
Полицијата поднесе кривична пријава против М.Ј.(46) од Гевгелија, поради измама.
„Пријавената, на 13 септември на царинскиот терминал на Граничниот премин „Богородица“, го довела во заблуда грчкиот државјанин К.Г.К., на начин што лажно се претставила дека е застапник во царински постапки и лажно му прикажала факти дека сторил тежок царински прекршок, поради што ќе биде задржан на македонско-грчката граница од страна на царинските власти и му побарала 2.000 евра, за да му помогне, на што се согласил“, објави МВР во дневниот билтен.