Црна хроника
Нема кој да плати за погребот на починатата Бугарка во Струга, трошоците се трупаат
Се трупаат трошоците на струшкиот суд оти веќе четири месеци нема кој да плати за погребување на бугарската државјанка, шеесет и двегодишната Павлина Христова – Панова.
Претседателот на струшкиот суд, Ади Усеини во интервју за „Академик“ вели дека судот нема пари, но ниту Судскиот буџетски совет, ниту Бугарската амбасада засега не одговараат на барањата на судот да се плати погребот.
Трошоците од ден во ден растат бидејќи телото се наоѓа во комората за замрзнување на битолската капела, за што судот плаќа по 1.640 денари дневно.
„Се обративме до Министерство за правда, а преку нив до Министерството за надворешни работи во очекување дека тие што побргу ќе искомуницираат со Бугарската амбасада и конзулат, но тие задоцнија многу, а ние за услугата од битолската капела плаќаме 1.640 денари на ден. После феријата ни се јавија оттаму, по што јас лично комуниницирав со бугарскиот конзул петнаесетина пати, му велам: ‘што ќе се прави, таа е ваша државјанка, не можете на судот да му правите проблем и онака си имаме доволно финансиски проблеми’. Се обративме до Судски буџетски совет да ни одобрат средствата, искомунициравме преку Министерството за правда и МНР и со Бугарската амбасада со цел тие да ги сносат трошоците. И еве уште чекаме одговор и од Судскиот буџетски совет и од Амбасадата. Телото си стои во фрижидерот, трошоците се зголемуваат, без средства не може да се погребе. Статус кво, никој не се занимава со овој проблем“, вели Усеини за „Академик“.
Павлина Христова – Панова беше пронајдена мртва во изнајмена соба во Струга. Обдукцијата покажала дека починала од мозочен удар, немала ниту лична карта, ниту патна исправа, а немала ниту блиски роднини во Бугарија кои се живи.
Трошоците за телото на Бугарката се непланиран трошок за судот, којшто се соочува со огромни финансиски проблеми. ЕВН и Македонски пошти веќе испратиле тужби до судот за неплатени сметки, па можно е „да му се суди на Судот“.
„Се молиме со претпријатијата за долговите на судот, но нормално доаѓа време кога тие поднесуваат тужби против нас: еве неодамна пристигна тужба од ЕВН за неплатени сметки. Имаме тужба и од Пошта, за доставата, се работи за огромни суми. И доколку идеме на суд, ќе се донесе пресуда, потоа најверојатно ќе дојде до блокирање на сметката, a за евентуалниот понатамошен развој на приказната ќе ве информирам дополнително. Во вакви ситуации единствена надеж ни е Судскиот буџетски совет“, вели претседателот на Судот.
Усеини е претседател на Судот од 2007 година. Во овој суд актуелни се кривичните предмети поврзани со малверзации со дивоградбите. Наскоро ќе треба да почне и судскиот процес против поранешниот градоначалник на Струга, Рамиз Мерко кој според обвинеието дозволил незаконска изградба на објект додека бил градоначалник./крај/академик/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.