Дваесетгодишен авганистански имигрант е убиен во вторникот вечерта на југоистокот од Србија во близина на Пирот, а за убиството е осомничен и уапсен локален ловец, соопшти во средата српското министерство за одбрана.

Авганистанецот застрелан во градите го нашле припадниците на заедничките сили на војската и на полицијата на Србија во текот на редовната патрола меѓу селата Славиње и Изатовци откако се слушнале истрели.

На местото од инцидентот затечени се шест имигранти, од кои еден со прострелна рана во градниот кош, и четворица локални ловци од кои едниот признал дека пукал.

Триесет и деветгодишниот ловец од Пирот изјавил во полицијата дека со колегите бил во лов на диви свињи и оти случајно го застрелал имигрантот. Групата имигранти, според неговиот исказ излегла од шума и се движела низ висока трева а тој стрелал во темницата во нив од растојание од сто метри со карабин оптика мислејќи дека се диви свињи.

Полицијата ја продолжува истрагата и ги испитува сите околности на инцидентот, како и дали ловците биле во недозволен лов, се наведува во полициското соопштение.

Меѓутоа, се смета дека ловецот го прекршил основното правило дека во цел се пука само доколку таа е јасно воочлива, а не се пука на сенка, шум претпоставувајќи дека е дивеч и оти ноќно време се користи рефлектор./крај/мф/сн

Извор: Макфакс