Регион
Орбан: Нема да ги прифатиме определните квоти за распоред на бегалците
Унгарија нема да се согласи со определените нквоти за распоредување на бегалците, бидејќи тие ќе го „легализираат нивниот престој во земјата“, изјави унгарскиот премиер Виктор Орбан на седница на парламентот, пренесуваат унгарските медиуми.
Според унгарскиот премиер, камповите за бегалците треба да се градат „надвор од Европа“, а унгарските власти исто така предложиле одделување на оние „кои по завршувањето на војната сакаат да се вратат во своите родни места, од оние кои што сакаат засекогаш да останат во Европа”.
Орбан, исто така, ги повикал унгарските пратеници да усвојат измени на законот за армијата, кои ќе и овозможат да дејствува надвор од Унгарија. „Ако Европа не може да ги заштити своите граници, тогаш ние сами треба да ги заштитиме“, категоричен е унгарскиот премиер.
Во последните неколку месеци Европската унија (ЕУ) е подложена на невиден притисок од страна на мигрантите, од кои повеќето сакаат да се стигнат во Германија. Според последните податоци на Меѓународната организација за миграција, од почетокот на годината во Европа пристигнале над 473 илјади мигранти. Главниот пат по кој тие продираат до стариот континент, преку Грција и земјите од западен Балкан. Властите во Атина организирано ги превезуваат мигрантите од островите во Егејското Море, до северната граница, а од таму тие преку Македонија заминуваат за Србија.
Од српскиот граничен премин Прешево тие потоа се насочувани кон Унгарија, а од средината на минатата недела и кон Хрватска. Ова доведе до донесувањето на нови мерки од страна на властите во Будимпешта, кои изградија ограда долж границите со Србија и Хрватска и на 15-ти септември воведоа строги закони за илегалните мигранти кои пристигнуваат во земјата.
Европската комисија (ЕК) им предложи на сите 28 земји од Европската унија да се воведат квоти за распоредување на 160-те илјади мигранти. Против овие квоти досега се изјаснија Унгарија, Чешка, Словачка, Полска, Романија, како и балтичките држави. Според проценките на експертите до крајот на годината, протокот на мигранти во ЕУ може да надмине еден милион луѓе.
Од ЕК изјавија дека оваа бегалска криза е најголемата во светот, уште од крајот на Втората светска војна, а експертите дури ја споредуваат и со големата преселба на народите. На 23-ти септември членките на ЕУ ќе одржат и состанок на кој ќе бидат разгледани проблемите со миграцијата./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.
Регион
Земјотрес од 4,3 степени утрово во Србија
Утрово земјотрес со јачина од 4,3 степени според Рихтеровата скала е регистриран во регионот на Кладово, соопшти Републичкиот сеизмолошки завод.
Земјотресите со ваков интензитет можат да предизвикаат помали оштетувања на зградите во епицентралното подрачје, јавуваат српските медиуми.
Засега нема извештаи за евентуална штета.