Свет
ОН: Пандемијата на Ковид-19 ја зголеми екстремната сиромаштија во светот
Поради пандемијата на коронавирус, бројот на луѓе во светот на кои им е потребна хуманитарна помош за да преживеат достигна нови рекорди, соопшти Организацијата на Обединетите нации – ООН, истакнувајќи дека екстремната сиромаштија драматично се зголемила за само една година.
На едно од 33 лица ќе им треба помош за да ги исполнат основните потреби како што се храна, вода и санитарни услови во 2021 година, што е зголемување за 40 проценти оваа година, се вели во во глобалниот хуманитарен извештај на организацијата.
Тоа значи дека на 235 милиони луѓе ширум светот им е потребна помош, претежно во Сирија, Јемен, Авганистан, Демократска Република Конго и Етиопија, се додава во извештајот.
„Кризата не е завршена“, рече генералниот секретар на ООН, Антонио Гутереш.
„Во буџетот за хуманитарна помош недостасуваат сè повеќе пари како што се влошува глобалната пандемија“, додава Гутереш.
Државите дадоа рекордни 17 милијарди долари во 2020 година за заеднички хуманитарен одговор, опфаќајќи 70 проценти од луѓето во неволја, што е зголемување за 6 проценти во споредба со 2019 година, се наведува во извештајот.
Но, ОН предупредија дека собрале помалку од половина од 35 милијарди долари, потребни за борба против раширениот глад, борба против сиромаштијата и чување на децата во училиштата, при тоа ги повика побогатите земји да дадат финансиски придонес.
„Богатиот свет сега може да ја види светлината на крајот од тунелот“, рече во изјавата претставникот на ООН за хуманитарни активности Марк Лоукок. „Тоа не важи за најсиромашните земји“, додаде тој.
Земјите ширум светот се вели дека постигнуваат постојан напредок од 90-тите години во намалувањето на екстремната сиромаштија, која Светска банка, мултилатерален заемодавач за развој, ја дефинира како живот со 1,90 долари или помалку на ден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Владејачката партија во Грузија номинираше поранешен фудбалер за претседателски кандидат
Грузиската владејачка партија Грузиски сон денеска го предложи поранешниот пратеник и професионален фудбалер Михеил Кавелашвили за свој кандидат на претстојните претседателски избори, закажани за 14 декември.
Кавелашвили, кој накратко играше за Манчестер Сити во средината на 1990-тите, беше еден од основачите на фракцијата Народна Шакта, која произлезе од партијата Грузиски сон, и е познат по серијата остри антизападни изјави, објави Ројтерс.
Во септември тој ја опиша опозицијата како „петта колона“ која се обидува да го загрози мирот во Грузија под инструкции на „американската администрација и одредени сенатори“, додека во јуни го обвини американскиот конгресмен дека планира „насилна револуција и Украинизација на Грузија“.
Свет
Украина бара воена помош од Јужна Кореја за одбрана од Русија
Украинска делегација, предводена од министерот за одбрана Рустем Умеров, оваа недела ја посети Јужна Кореја за да побара воена помош за потребите на Киев во војната со Русија, јавуваат медиумите.
Делегацијата се состана со јужнокорејскиот советник за национална безбедност Шин Вон-сик за да разменат мислења за конфликтот во Украина, објави весникот „ДонгА Илбо“, без да наведе извор.
Исто така, South China Morning Post оваа недела објави дека украинска делегација планира да ја посети Јужна Кореја за да побара воена помош, цитирајќи информиран извор, пишува Ројтерс.
На прашањето за овие извештаи, официјален претставник од кабинетот на претседателот Џун одби да ги потврди. Портпаролот на Министерството за одбрана на Јужна Кореја, исто така, не го потврди доаѓањето на украинската делегација за време на редовниот брифинг во вторникот.
Во интервју за јужнокорејската телевизија КБС во октомври, украинскиот претседател Володимир Зеленски најави дека Киев ќе испрати детално барање до Сеул за воена поддршка, вклучувајќи артилерија и системи за противвоздушна одбрана.
Свет
Долниот дом на Австралија го усвои законот за забрана на социјалните мрежи за деца под 16 години
Долниот дом на австралискиот парламент усвои закон со кој може да се воведе забрана на социјалните мрежи за деца под 16 години, што претставува една од најстрогите контроли на социјалните мрежи во светот, пренесува Ројтерс.
Законот е усвоен со 102 гласа „за“ и 13 „против“, а се очекува наскоро Сенатот да го разгледа за да биде усвоен пред крајот на парламентарната година.
Премиерот Ентони Албанес, кој е за овој закон, тврди дека прекумерната употреба на социјалните мрежи го загрозува физичкото и психичкото здравје на децата.
Законот ќе бара од социјалните мрежи да имплементираат систем за проверка на возраста, со можност за казна од 32 милиони долари за непочитување.
Иако Гугл и Мета побараа одложување на законот додека не заврши тестирањето на системот за проверка на возраста, јавноста го поддржа законот, додека родителските групи го гледаат како клучна мерка за заштита на децата.
Анкетите покажаа дека 77 отсто од Австралијците ја поддржуваат забраната, додека противниците на законот ги наведуваат прашањата за приватноста и слободата на изразување.