Црна хроника
Најдена ДНК на еден од обвинетите во Монструм во „опел омегата“
Судот во петокот изведуваше писмени докази предложени од обвинителството за случајот Монструм, односно за грозоморното убиство на Смилковското езеро.
Во автомобилот „опел омега“ којшто беше најден неколку дена по убиството и со кој, според обвинението, се превезувале дел од обвинетите биле пронајдени потни траги од ДНК на првообвинетиот Алил Демири. Според обвинението, Агим Исмаиловиќ го зел ова возило од паркинг во Топанско поле, додека обвинетите Алил Демири и Африм Исмаиловиќ, по убиството, со истиот автомобил дошле на обиколницата кај Качанички пат каде ги чекал обвинетиот Хаки Азири, го оставиле „опелот“ и се качиле во автомобилот на Азири.
Според адвокатот на дел од обвинетите, Насер Рауфи овој доказ нема никаква врска со убиството, а автомобилот не бил виден на местото на убиството.
На тркалата на овој автомобил било најдено земјиште кое се совпаѓа со земјиштето на Смилковското езеро. И ова, според Рауфи не е релевантен доказ бидејќи таков вид на земјиште имало на огромна површина. Сопственоста на автомобилот „опел омега“ се уште не е утврдена.
Траги од обвинетите и од автомобилот „опел омега“ на местото на убиството, според Рауфи не се најдени. Не е најдено ниту оружјето со кое биле извршени убиствата.
„Поголемиот дел од доказите се работи кои се најдени кај обвинетите при претресите во домовите, некои папиларни линии на документи од обвинетите. Значи ништо од писмените докази нема поврзаност со убиството. Сигурен сум дека нема докази од проста причина што обвинетите не се сторителите на овој грозоморен чин“ изјави Рауфи.
Меѓу доказите на обвинителството беа листа на појдовни и дојдовни повици на телефоните на обвинетите, односно предмети коишто биле најдени при претресите во домовите на обвинетите.
Се споменуваа вештачења на траги од биолошко потекло, отпечатоци од обвинетите на документи и сметки коишто биле најдени во нивните домови, мал црн нотес, address book, на обвинетиот Африм Исмаилови, како и верска литература.
Меѓу доказите е и идентификација според фотографии од страна на загрозениот сведок Е1.Телефоните на обвинетите биле прислушувани од 21 април девет дена по петкратното убиство.
Митко Солаков, адвокат на обвинетиот Сејди Рами побара судот да утврди со кого разговарале точно обвинетите, бидејќи неговиот клиент се товари единствено врз основа на телефонските повици.
И адвокатот на останатите обвинети, Насер Рауфи побара да се селектираат телефонските повици односно, да се издвојат повиците кои се поврзани со кривичното дело од другите повици. Судијата рече дека ќе ги земе во предвид нивните забелешки во текот на постапката, кога ќе се направи севкупна анализа на севкупниот материјал, во фаза на одлучување.
Судскиот процес за грозоморното убиство коешто ја потресе цела земја почна на 20 декември минатата година, а на обвинителната клупа седнаа Агим Исмаиловиќ, Фејзи Азири, Рами Сејди и Хаки Азири. Судењето се снима визуелно и тонски со две камери. На другите двајца обвинети, Алил Демири и Африм Исмаиловиќ кои се во бегство,им се суди во отсуство.
Во убиството коешто се случи на 12-ти април без причина беа убиени матурантите Кире Тричковски, Филип Славковски, Цветанчо Ацковски, Александар Наќевски и рибарот Борче Стефковски./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.