Европа
Политичките лидери за Суперлигата: Богатите не може да ја присвојат убавината на фудбалот
Дванаесет големи европски фудбалски клубови синоќа објавија дека ќе стартуваат нова Суперлига, затворено натпреварување, во кое ќе играат само најсилните клубови и кое ќе биде директна конкуренција на Лигата на шампионите на УЕФА.
„Дванаесет богати европски клубови доцна во неделата постигнаа договор за воспоставување ново фудбалско натпреварување – Суперлига, во кое ќе учествуваат 20 клуба“, објави „Реал Мадрид“, чиј претседател беше избран за главен човек на новото натпреварување.
Во него досега потврдија дека ќе учествуваат шпанските „Реал Мадрид“, „Барселона“ и „Атлетико Мадрид“, англиските клубови „Арсенал“, „Челси“, „Тотенхем“, „Ливерпул“, „Манчестер сити“ и „Манчестер јунајтед“, како и „Јувентус“, „Милан“ и „Интер“ од италијанската Серија А. Поканети се уште три засега неименувани клуба да му се приклучат на проектот.
По најавата за новото фудбалско натпреварување, реакции доаѓаат од сите страни, па и од политичките кругови.
Меѓу првите што реагираа беа британскиот премиер Борис Џонсон и францускиот претседател Емануел Макрон.
„Плановите за европската Суперлига би биле многу штетни за фудбалот и ние ги поддржуваме фудбалските власти да преземат акција“, објави Џонсон на својот официјален профил на „Твитер“.
„Тоа би било удар директно во срцето за домашната лига и би ги загрижило навивачите во целата земја. Клубовите учесници мора да им дадат детаљни одговори на своите навивачи и пошироката фудбалска јавност пред да преземат понатамошни чекори“, додаде британскиот премиер.
Макрон веднаш се спротивстави на објавата.
„Претседателот на Републиката ја поздравува позицијата на француските клубови да одбијат да учествуваат во фудбалскиот проект Суперлига, што го нарушува принципот на солидарност и спортски заслуги“.
Суперлигата ја коментира и унгарскиот премиер Виктор Орбан, кој исто така е против идејата.
Орбан верува во единството на спортот на европско ниво, како и во принципот на солидарност и го поздравува силното спротивставување на европската фудбалска организација УЕФА на плановите за создавање европска Суперига, порача унгарскиот премиер преку својот кабинет.
„Унгарија е убедена дека убавината и големината на најголемата игра во светот лежи во тоа што таа им припаѓа на сите, а богатите не може да си ја присвојат за себе“, истакна унгарскиот премиер.
Европската комисија исто така реагираше во врска со Суперлигата. Ова на „Твитер“ го стори потпретседателот на ЕК, Маргаритис Шинас.
„Мора да го браниме европскиот модел на спорт заснован на вредности, разновидност и инклузивност. Не доаѓа предвид спортот да биде резервиран за неколку богати и моќни клубови кои сакаат да ги раскинат врските со националните федерации“, напиша Шинас, комесар за промоција на европски вредности и начин на живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Макрон: Идеите на екстремната десница се шират во Европа
Францускиот претседател Емануел Макрон предупреди денеска во Дрезден за ширењето на екстремната десница во Европа и повика на дополнителна помош за Украина бидејќи се работи и за безбедноста во Европа.
„Секаде во нашите демократски општества, идеите кои доаѓаат од екстремната десница се шират. Овој корумпиран ветер се шири низ Европа, тоа е реалноста. Конечно мораме да се разбудиме“, рече Макрон во својот говор пред реновираната катедрала во Дрезден, кој беше целосно уништен во сојузничкото бомбардирање.
На вториот ден од неговата тридневна посета на Германија, во својот говор, Макрон се осврна конкретно на Унгарија, каде што „европските пари се добредојдени“, но не се почитува независноста на судството и медиумите.
„Постои фасцинација од авторитарните режими. Само неколку километри од нас. Но, Европа не е себична, туку заедничка база на вредности и култура на индивидуална и политичка слобода“, рече Макрон.
„Она што е загрозено во Украина е безбедноста на Европа. Ниту Франција, ниту Германија не се повеќе безбедни ако во Украина победи владеењето на посилните“, рече Макрон.
Тој рече дека имајќи го предвид големиот скептицизам, особено кај граѓаните на Источна Германија, во однос на помошта за Украина, дека заедничкиот европски однос кон ова прашање е клучен.
„Ние не водиме војна против рускиот народ, но исто така не можеме да дозволиме авторитарен, ревизионистички режим како оној во Москва да и се заканува на Европа“, рече Макрон.
Тој уште еднаш ја истакна потребата да се подигне одбранбената подготвеност на Европа и да се стави крај на силното потпирање на САД. Макрон ја започна својата тридневна државна посета на Германија во неделата со средба со германскиот претседател Франк-Валтер Штајнмаер, а во понеделникот продолжи со положување венец на споменикот на Холокаустот и говор во Дрезден.
Посетата завршува утре со средба со германскиот канцелар Олаф Шолц и заедничка средба на германската и француската влада.
Европа
Франција: ученик нападнал професорка со нож на час, се обидел да побегне
Денеска 18-годишен ученик со нож нападнал професорка за време на час по англиски јазик во училиште на западот на Франција, јави телевизијата БФМ.
Средношколецот по нападот се обидел да побегне, но бил приведен.
Професорката се здобила со полесни повреди на лицето, пренесуваат француските медиуми.
Извор близок до истрагата вели дека професорката неколку минути пред нападот разговарала со ученикот за неговото неодамнешно неколкудневно отсуство, пренесува Танјуг.
Европа
Полска го ограничува правото на слободно движење на руските дипломати
Полска ќе воведе ограничувања кога станува збор за движењето на руските дипломати на нејзина територија поради вмешаноста на Москва во хибридната војна против Европската унија, изјави денеска министерот за надворешни работи Радослав Сикорски.
Односите меѓу Полска и Русија се затегнати по избувнувањето на конфликтот во Украина во 2022 година.
Варшава ја обвинува Москва и за шпионски активности и саботажа на територијата на Полска, пренесува Ројтерс.
„Се надеваме дека Руската Федерација ќе го сфати ова како многу сериозно предупредување“, изјави Сикорски за новинарите во Брисел.
Тој додаде дека руската амбасада во Варшава ќе биде известена за оваа одлука и дека ограничувањата за движење важат за целиот персонал во амбасадата и конзулатите, освен за амбасадорот.