Македонија
Филипче: Ревакцинација во Врање и Ниш за Македонците кои примија „астразенека“ во Србија
Македонците вакцинирани во Србија кои примија од вакцината на „Астразенека“ втора доза ќе примат во Србија. Министрите за здравство на Македонија и на Србија, Венко Филипче и Златибор Лончар, договараат место близу границата да им олеснат.
Министерот Филипче извести дека втората доза вакцинираните во Србија ќе можат да ја примат во рок од неколку дена на пунктови во Врање или во Ниш кои допрва треба да бидат утврдени.
„Утрово разговарав со министерот Лончар да се организира пункт поблиску до нашата земја, за поголем број граѓани вакцинирани во Србија да можат да ја примат втората доза меѓу 17 и 20 јуни. Тој зеде обврска да го организираме тој процес. Детали ќе соопштиме кога ќе биде договорено. Веројатно вакцинацијата ќе се прави во некој од постојните пунктови во Врање или Ниш оти мора да се внимава на чување на вакцините и фрижидери. Ќе известиме кога ќе договориме конкретно“, рече министерот Филипче.
Во Србија пред три месеци вакцина за заштита од Ковид-19 примија околу 15.000 Македонци, а најголемиот број од нив беа вакцинирани со вакцината на „Астразенека“, која кај нас е забранета за лица помлади од 60 години.
Вакцинираните со други вакцини во странство добија можност преку нашиот систем за вакцинација да се појават за втора доза да примат дома.
Министерот Филипче извести дека оваа можност ја искористиле само околу 1000 граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Вјолца Бериша ќе раководи со Министерството за земјоделство до изборот на нов министер
Министерството за земјоделство, шумарство и водостопанство ја информира јавноста дека со верификацијата на претеничкиот мандат на 28.05.2024 година на министерот за земјоделство, шумарство и водостопанство, Љупчо Николовски, заврши извршувањето на функцијата министер.
Со министерството за земјоделство, шумарство и водостопанство, до избор на нов министер, со министерството ќе раководи заменик министерката за земјоделство, шумарство и водостопанство Вјолца Бериша.
„Во овој период, согласно овластувањето од 27.05.2024 година, заменик министерката за земјоделство, шумарство и водостопанство Вјолца Бериша, во целост може да ги извршува тековните активности за непречена работа на министерството, а веќе извршена е и измена и во Централниот регистар“, велат од МЗШВ.
Македонија
185 санкционирани возачи на мотоцикли
Во текот на вчерашниот ден во периодот од 15.00 до 22.00 часот спроведена е акциска контрола на територијата на Република Северна Македонија за санкционирање на прекршоци што ги прават возачите на мотоцикли, при што санкционирани се 185 возачи, извести МВР.
„Од нив, 113 возачи не користеле заштитна кацига за време на возење, 33 возеле без возачка дозвола, седум мотоцикли се одземени поради истечена сообраќајна дозвола и предизвикување голема бучава… За време на контролата санкционирани се и 197 други видови на сообраќајни прекршоци“, соопшти МВР и додаде дека сообраќајните контроли продолжуваат и во наредните денови.
Македонија
ДС: Брза промена на надлежностите на некои министерства, за да се формира нова Влада и да се спречи целосен колапс на државата
Демократскиот сојуз смета дека промената на надлежностите на некои министерства и формирањето нови треба да се одвива со брзо темпо за да се формира нова Влада и да се спречи целосен колапс на државата.
„Сведоци сме на целосно разградени институции и нивна неефикасност и разнебитеност. Најеклатантен пример е Министерството за здравство, каде Клиничкиот центар е во целосен колапс и истиот не може да обезбеди врвна здравствена заштита на граѓаните.
Состојбата е слична во многу други институции, а перфидните најави и закани за дестабилизација на државата на етничка основа само ја изоструваат потребата од брзо формирање Влада, која треба да профункционира со полн капацитет.
Добро е во Парламентот да има координации, усогласувања и компромиси, но врвен државен интерес е реорганизација на министерствата и избор на нова Влада. Сѐ друго е политизација и манипулација, на штета на интересите на граѓаните“, велат од Демократскиот сојуз.