Вредноста на накитот кој во неделата околу пладне беше украден од хотелот „Carlton“ во Кан на францискиот Азурен брег, засега се проценува на „повеќе милиони евра“, а првичната процена од 40 милиони евра „не е сигурна“ во оваа фаза, изјавија во неделата навечер извори од државното обвинителство.

„Процената од 40 милиони евра не е потврдена, изнесена е на самиот почеток од истрагата меѓутоа штетата во моментов се пресметува. Тоа е привремена процена, таа не е сигурна“, изјавиле од државното обвинителство во Грасе за AFP.

Според истиот извор сторителот на кражбата којашто се случи на изложба на накит во едно од крилата на хотелот, бил вооружен со автоматски пиштол, лицето му било прекриено со шал или марама и имал кацига. Побегнал со повеќе вреќички со накит и часовници опточени со дијаманти.

Кражбата се одигра во 11.30 часот по локално време во присуство на повеќе лица, меѓу кои и припадници на обезбедувањето.

„Се` се одиграло многу брзо и без насилство“, истакнуваат од обвинителството, одбивајќи да дадат повеќе информации.

Според репортерот на американската телевизиска мрежа ABC News кој се повикува на неименуван полициски службеник во Кан, разбојникот бил вооружен со „колт 0,45“. Додал и дека се` уште не се знае дали крадецот имал соучесници, како и дека претстои суптилна и обемна истрага. Телевизијата се држи до првичната процена на ограбените скапоцености од над 40 милиони евра.

Станува збор за накит на „Leviev diamond house“ од Лондон сопственост на руско-израелскиот милијардер Лев Левиев, донесен во хотелот за изложбата во салонот „La Cote“ која требало да трае до август.

Ова е трет ваков грабеж во одморалиштата на француската ривиера во последните три месеца. Во мај годинава во текот на одржувањето на последното издание на Филмскиот фестивал во Кан, беше украден брилјантски ѓердан од брендот „Chopard“ на швајцарската компанија „De Grisogono“ во вредност од 1,92 милиони евра беше украден од хотелот „Novotel“./крај/мф/сн