Hitech
Првиот електричен Тesla автомобил доаѓа на Стартап викенд Скопје
Хрватскиот претприемач и инвеститор Саша Цвитојевиќ од Загреб до Скопје ќе патува со својата Tesla S, првиот електричен Тесла автомобил кој доаѓа во Македонија.
Тој ќе присуствува на вториот Стартап викенд Скопје, којшто ќе се одржи од 19-ти до 21-ви септември во просториите на New Man’s Business Accelerator. Патувањето Цвитојевиќ го најави на својот Facebook профил, каде побара помош околу логистиката за полнење на автомобилот со електрична енергија по пат.
„Имам план да појдам на Стартап викенд во Скопје со мојот електричен автомобил. Ќе биде тоа одлична промоција за употребата на електричните автомобили во регионов, каде на ова сѐ уште се гледа со сомнеж. Ќе поминам околу илјада километри по пат на кој нема никаква инфраструктура за електрични возила“, појасни Саша Цвитојевиќ во својот статус. Со коментари и идеи веќе се јавија луѓе нудејќи помош и решенија за полнење на батериите по пат.
Саша вози Tesla Model S, комплетно електричен луксузен автомобил со пет врати произведен од Tesla Motors. Овој модел е на врвот по својата економичност и безбедност, а во светот се продадени повеќе од 25 илјади возила.
Саша Цвитојевиќ е успешен претприемач од Хрватска со долгогодишно искуство во секторите здравство, мобилни телекомуникации и дистрибуција. Активен член е на хрватската мрежа на бизнис ангели и приватен инвеститор во иновативни стартапи во раната фаза на нивниот развој. Тој доаѓа во Скопје како ментор на Стартап викендот со цел да го сподели своето знаење со локалните стартап тимови и да најде нови идеи во кои тој би инвестирал.
Startup Weekend е 54-часовен настан, каде програмери, дизајнери, маркетинг експерти, продукт менаџери и стартап ентузијасти се собираат да ги споделат своите идеи, да создадат производи и да ги лансираат своите стартап компании. Startup Weekends претставуваат продолжени викенди, полни со идеи, споделување на искуство, поврзување и можност да се научат начините и методите, како од една идеја да се создаде успешен бизнис.
На настанот учествуваат претприемачи и млади професионалци кои имаат различни профили и доаѓаат од различни сфери, како на пример: ИТ специјалисти, дизајнери, менаџери, маркетинг експерти, бизнисмени, потенцијални приватни инвеститори, невладини организации и сл.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Hitech
WhatsApp подготвува корисна промена
Повикувањето луѓе на WhatsApp ќе стане многу полесно.
WhatsApp развива нова функција која ќе ви овозможи да повикувате луѓе директно од апликацијата, без претходно да ги зачувате како контакти во вашиот телефон, објави веб-страницата WABetaInfo.
Како што е наведено, оваа функција е достапна за тестирање на оние кои ја имаат бета апликацијата за Android, верзија 2.24.9.28.
Најверојатно, додава WABetaInfo, интернет податоците ќе се користат за повикување на овој начин, што значи дека повиците ќе бидат поевтини отколку кога ќе повикате некого во странство користејќи го „традиционалниот“ метод.
Сè уште нема детали за тоа кога оваа функција би можела да биде достапна за корисниците ширум светот, но обично не треба многу време откога ќе се појави во бета верзија.
Hitech
(Видео) 7 милиони прегледи: Мајкрософт објави снимка со вештачка интелигенција на Мона Лиза како рапува
Мајкрософт ја претстави новата технологија за вештачка интелигенција наречена VASA-1, која може да комбинира фотографија и аудио клип и да генерира реални видеа.
Тие ја претставија новата технологија со видео на кое Мона Лиза рапува на песната Папараци, но ова не е хит на Лејди Гага, туку рап песна што Ен Хатавеј ја напиша и изведе во ток-шоуто на Конан О’Брајан во 2011 година.
Microsoft just dropped VASA-1.
This AI can make single image sing and talk from audio reference expressively. Similar to EMO from Alibaba
10 wild examples:
1. Mona Lisa rapping Paparazzi pic.twitter.com/LSGF3mMVnD
— Min Choi (@minchoi) April 18, 2024
Видеото набрзо стана вирално и беше прегледано повеќе од 7,1 милиони пати на само еден профил на „Икс“.
„Ова е толку смешно, плачев од смеење“, „Уште едно страшно видео со вештачка интелигенција“, „Ова е морничаво“, „Кога би можел Да Винчи да го види ова“, се дел од коментарите.
Hitech
Во Кина побарувачката за мобилни телефони на „Епл“ значително се намали, продажбата на „Хуавеј“ скокна за 70 отсто
Испораките на мобилни телефони на „Епл“ во Кина паднаа 19 отсто во првиот квартал, што ја одразува заканата за доминантната позиција на американскиот гигант во повисокиот сегмент по враќањето на „Хуавеј“ на пазарот, покажуваат податоците на пазарот. Уделот на „Епл“ на најголемиот пазар на паметни телефони во светот падна на 15,7 отсто во првиот квартал, од 19,7 отсто на почетокот на 2023 година. Ова го доведе американскиот гигант речиси на исто ниво со „Хуавеј“, чија продажба скокна 70 отсто, според истражувачката компанија Counterpoint.
„Виво“ ја презеде круната на „Епл“ како најголем продавач на паметни телефони во Кина. Американската компанија падна на третото место, зад „Хонор“, бренд на подостапни уреди. На четврто место е „Хуавеј“, чиј пазарен удел скокна од минатогодишните девет на 15,5 отсто.
„Враќањето на „Хуавеј“ на пазарот директно влијаеше на „Епл“ во премиум-сегментот. Треба да се додаде дека побарувачката за нови мобилни телефони на „Епл“ за замена на постарите модели беше малку придушена во споредба со претходните години“, рече аналитичарот на Counterpoint, Иван Лам, во соопштението за печатот.
Во меѓувреме, „Епл“ почна промотивни кампањи обидувајќи се да ги привлече потрошувачите со попусти, вклучувајќи субвенционирање одредени модели на „Ајфон“ до 1.300 јуани (168,29 евра).
Минатата недела „Хуавеј“ ѝ ја претстави на јавноста новата серија смартфони Pura 70. Во август минатата година, по долга пауза, ја лансираа серијата Mate 60, која некои аналитичари ја протолкуваа како триумф над американските санкции, врз основа на софистицирано домашно производство на чип.
Канадската истражувачка компанија TechInsights очекува Кинезите да купат повеќе од 50 милиони мобилни телефони оваа година, вклучително и 10 милиони од Huawei Pura 70. Тоа ќе го стави „Хуавеј“ на прво место, со пазарен удел од 19 отсто, што е повеќе од 12 отсто минатата година.
Во првиот квартал кинескиот пазар на паметни телефони порасна 1,5 отсто продолжувајќи го позитивниот тренд од крајот на 2023 година, според Counterpoint.