Зачестена појава на интернет измами со нелегално превземање и измамничко посредување во деловната комуникацијата преку електронска пошта (e-mail) помеѓу македонски компании и нивните бизнис партнери од странски земји забележана е во последно време, предупреди во неделата МВР.

Според единицата за компјутерски криминал овие измами најчесто се забележани во комуникацијата на македонски компании со нивни партнери од Азија, Африка и Латинска Америка. Добро организирани меѓународни криминални групи со примена на т.н spam пораки и методи на phishing  успеваат да ја  “украдат”  лозинката  за  пристап до email-от на еден од бизнис партнерите при што добиваат непречен пристап до историјата на целокупната комуникација. Криминалните групи креираат нови e-mail адреси кои минимално односно за еден карактер се разликуваат од оригиналните и  истите тешко се забележуваат во комуникацијата, се вели во соопштението Измамниците со примена на “украдената” лозинка  ја преземаат оригиналната порака , ја модифицираат и ја препраќаат од еден од лажно креираните емаил адреси. На тој начин двете страни во комуникацијата се ставени во заблуда дека комуницираат со вистинскиот партнер. Најчесто измамниците, кои се претставуваат како вистинскиот партнер – испорачател на договорената стока му испраќаат порака на партнерот – набавувач  дека  ја промениле банкарската сметка за уплата на средствата и бараат авансните средства да бидат уплатени на нова сметка која ја доставуваат во прилог на пораката. Овие криминални групи располагаат со банкарски сметки во многу земји од светот: САД, Хонг-Конг, Кипар..и многу често доколку некоја од сметките е блокирана за краток рок доставуваат алтернативна сметка за уплата. За успешно разоткривање на ваквите меѓународни криминални групи и пронаоѓање на сторителите потребна е соработка и координација помеѓу надлежните институции во земјите на засегнатите страни како и со други меѓународни институции за борба против организираниот криминал. Бидејќи процесот на разрешување и санкционирање согласно меѓународно-правните регулативи е  долготраен МВР препорачува превентивно делување во насока на сузбивање на овој вид кривични дела што опфаќа, внимателност при промена на ентитететите во комуникацијата (промена на e-mail адреса, промена на лице за контакт, промена на банкарска сметка и сл.), компаниите меѓусебно да обезбедат повеќекратен начин на авторизација и автентикација (телефонска потврда на наведеното во емаил пораката, дигитални потписи на пораките и сл.) и доколку се забележат сомнителни содржини случајот да се пријави во Единицата за компјутерски криминал пред да се изврши уплатата. /крај/